IMeya ibuyelwe ithemba kunyathela uNdunankulu neKhabhinethi yakhe e-Inkosi Langalibalele
UMnu uMduduzi “Sobholenyoni” Myeza oyiMeya kaMasipala iNkosi Langalibalele ukhala ngemali abayikweletwa imikhandlu eyehlukahlukene nokwenza kube nzima ukwenza izimfuno zomphakathi.
Uveze lokhu ngesikhathi kade kunomcimbi owaziwa nge-Operation Sukuma Sakhe, lapho uNdunankulu wesifundazwe iKwaZulu-Natal uMnu uThamisanqa Ntuli ubefike kanye neKhabhinethi yakhe. Lo mcimbi obungoLwesithathu ububanjelwe eMdwebu Sports Field, ngaphansi kukaWadi-14.
UMnu uMyeza uthe imali benguMasipala abayikweletwa imikhandlu eyehlukahlukene ilinganiselwe kwizigidi ezili-R123 489 117,90.
UMnyango wezeMfundo ubakweleta isikwelenta ewu-R 1 806 984,14 , uMnyango wezeMpilo izigidi eziyi-R 8 785 498,54 kanti wezokuHlaliswa kwaBantu
izinkulungwane ezingama-R540 236,33, oweZokuthutha wona izinkulungwane ezingama-540 236,33.
Eminye iMinyango okweleta iNkosi Langalibalele owabaSebenzi okuyizigidi engama-R 27 500 402,43 kanti oweNhlalakahle komphakathi izinkulungwane ezingama-R 366 803,24, inkampani kagesi u-Eskom ilinganiselwe kwizinkulungwane ezili-R 114 235,10 bese kuthi uMkhandlu uThukela wona ubakwelete izigidi ezingama-R 51 343 389,92.
“Lokhu omunye engakubuka njengokuhlambala kodwa akunjalo, ngoba lemali esiyikweletwayo ngabe yenza izinto eziningi emphakathini wakithi. Asifisi ukuba abaholi abagcina ngokuthembisa abantu intuthuko sigcine ngokungayilethi” kusho uMnu uMyeza.
Uthe babuyelwe yithemba ngokufika kukaNdunankulu uMnu uNtuli kanye noNgqongqoshe bakhe, bakwazi ukuhambela izindawo ezibanikeza inkinga.
“UMphathiswa woMnyango wezokuThutha esiFundazweni iKwaZulu-Natal uMnu uDuma (Siboniso) ngimazisile ngebhuloho laseZwelisha, osekuphele iminyaka lingapheli lokho kwenza abantu bathwale kanzima uma kunezimvula. Ungithembisileke ukuthi uzolisukumela phezulu loludaba” kubeka uMnu uMyeza.
Uphide wabalula ukuthi maduze uzokwethula ngokusemthethweni indlu ayakhe ngemali yakhe kuWard 7, ngoba ebona isimo sendlu abantu bakulowomuzi abahlala kusona.