Igcine ihluliwe iDSG koweSA20


Lugcine lugobile uphondo kuDurban Super Giants ebivutha engabaselwe kuBetway SA20.
Leli qembu laseThekwini yilona ebelihlezi esicongweni ku-log yeSA20 kodwa selehlele endaweni yesibili ngemuva kokuguqiswa yiPretoria Capital ngama-run ali-17 eSuperSport Park, eCenturion, ePitoli.
ISuper Giants inamaphuzu ayishumi nantathu ngemuva kwemidlalo emine. Ihlukaniswe yi-net run rate nePaarl Rocks esiqhwakele ngamaphuzu afanayo ngemuva kwemidlalo emithathu.
Izolo, iPretoria Capital iwine ithosi yathatha isinqumo sokubhetha kuqala. Ibeke ebhodini ama-run angama-204 kusawe amawikhethi ayisishiyagalolunye.
UWill Jack ubezenzela kulo mdlalo ngebhethi. Ushaye ikhulu lama-run emabholeni angama-43. Ugcine ekhishwe esenze ama-run ali-101.
Ulekelelwe nguPhil Salt noColin Ingram ukuze iCapital ibeke isibalo sama-run angaphezu ama-200.
USalt ushaye ama-run angama-23 kwathi u-Ingram wabhala angama-43 ebhodini. Amawikhethi eSuper Giants athathwe nguReece Topley othole amathathu, uJunior Dala ohlomule ngamabili kwathi uMaharaj, Marcus Stoinos, Dwaine Pretorius, noKeemo Paul bahlabana ngewikhethi eyodwa umdlali ngamunye.
Leli qembu laseThekwini lihlulekile wukujaha isibalo sama-run angama-204. Ligcine lihlanganise ama-run angamq-187 kusawe amawikhethi ayisikhombisa kuma-over angama-20.
UMatthew Breetzke, Jon-Jon Smut, noQuinton De Kock baqale kahle kodwa bangakwazi ukuqhubeka nomgqigqo wabo.
UBreetzke ushaye ama-run angama-33, uSmut wathola angama-27 njengoba uDe Kock ezitholele angama-25.
Ngasekupheleni komdlalo uMaharaj noPretorius bazimile ukuthola ama-run ngokuphuthuma kodwa kwasho ukuthi sekuvele konakele.
UMaharaj akazange akhishwe enama-run angama-25 emabholeni ali-12 kanti uPretorius akazange aphume enama-run ali-19 emabholeni ali-12.
ICapital ushwibe kahle kakhulu ukuze ivikele lesi sibalo sama-run. UJacks, Wayne Parnell noHardus Viljeon bonke bathole amawikhethi amabili kwathi eyesikhombisa kwaba ngekaJames Neesham.