IPaarl Rocks ivule igebe lamaphuzu amahlanu esicongweni

Ivule igebe lamaphuzu amahlanu esicongweni iPaarl Rocks iqumba phansi iMI Cape Town emdlalweni wabakhaya izolo ntambama eBoland Park, eKapa.

IPaarl Rocks isiqoqe amaphuzu ali-18 emidlalweni emihlanu yeBetway SA20 League.

IMI Cape Town iwine ithosi yathatha isinqumo sokushwiba kuqala. Ama-Rocks abeke ebhodi ama-run ali-162 kusawe amawikhethi amathathu kuma-over angamashumi amabili.

Kugqame uJason Roy, Jos Buttler noDavid Miller. URoy ubelijikijela ezihlweleni. Ugcine ephume eseshaye ama-runs angama-68 emabholeni angama-46 kwathi uButtler wahlanganisa angama-54 emabholeni angama-42.

UMiller bamkhiphe esenze ama-runs angama-24 emabholeni angama-20. IPaarl Rocks igcine yenze ama-run ali-162 kuma-over angama-20.

IMI Cape Town ibidinga ama-run ali-163 emabholeni ali-120 ukuze inqobe. Nokho ayikewazanga ukufinyelela kulesi sibalo sama-run. Iphume yonke seyenze ama-run ali-103 kuma-overs ali-18.2.

Bekubhoke u-Imaad Fortiun, Tabriaz Shamsi, no-Obed McCoy. UFortiun uthathe amawikhethi amathathu walekelwa nguShamsi noMcCoy abathole amabili umdlali ngamunye.

IMI Cape Town ihlulekile wukuthola umgqigqo wokushaya ibhola. UConnor Esterhuizen, Liam Livingstone noSam Curran yibona abebezama ukulwa impi yiMI Cape Town kodwa kwala.

U-Esterhuizen ushaye ama-run angama-32 kwathi uLivingstone wabhala angama-22. UFortiun ugcine eqokwe njengomdlali ovelele kulo mdlalo.

IPaarl Rocks ivule igebe lamaphuzu amahlanu kuDurban Super Giants eyibambe endaweni yesibili. ISuper Giants isidliwe imidlalo emibili ilandelana. ISunrises Eastern Cape ingase iyigudluze uma inqoba umdlalo wayo olandelayo.

Namuhla izotholana nePretoria Capital emdlalweni ozoba seSt George’s Oval, eGqeberha.