LAFA ELIHLE KAKHULU: ISADC ithi ukhetho eTanzania alubanga nobulungiswa
Ngesikhathi ethatha izintambo zokuhola iTanzania isigubhukane kulandela ukudlula emhlabeni kukaMengameli uJohn Magufuli okwayamaniswa nobhubhane loKhuvethe ngowezi-2021 wayethwelwe ngeqoma njengowesifazane wokuqala emlandweni wezwe ukungenxa kulesikhundla. Ngaleso sikhathi uSamia Suluhu Hassan wayeyiSekela likaMengameli.
NgokoMthethosisekelo waseTanzania uma uMengameli edlula emhlabeni izintambo ziwela kwiSekela lakhe. Ekuqokweni kwakhe uHassan, iTanzania yangena emlandweni wamazwe ambalwa ezwenikazi i-Afrika aseke aholwa abesifazane okubalwa kuwo iLiberia ngaphansi kukaMengameli u-Ellen Johnson Sirleaf, iMalawi eyake yaholwa uMengameli uJoyce Banda.
Eqenjini elibusayo eTanzania okuyilo elaliphambili ekukhululweni kwezwe iChama Cha Mapinduzi (CCM) nasemaqenjini aphikisayo akekho owayephikisana nokungena esikhundleni kukaHassan. Uqale ukuhlehlelwa izikhuni ngesikhathi ezama ukushintsha umthethosisekelo weqembu lakhe okwakuzoba nomthelela omkhulu kumalungu eqembu. Akubanga kuphela iqembu lakhe elambheka ngelinye iso, kepha naphikisayo.
Kuyiwa okhethweni lwangeledlule nje uHassan alimuzwa kahle iqembu lakhe okungangokuba abanye ngaphakathi eqenjini bebemnyundela. Ngaphambi kokhetho abaholi bamaqembu aphikisayo bathwale kanzima ngesikhathi bethola imiyalelo ebavimbelayo ukungenela ukhetho. Kwezinye izingxenye zezwe ezokuxhumana zivaliwe kwashaywa nothetho wesimo esimanzonzo. Sekungumlando ukuthi ngoMsombuluko ufungiswe njengoMengameli kulandela ukudla umhlanganiso ngama-98 wamaphesenti okhethweni.
Ufungiswe ngaphansi kwesimo esimanzonzo abantu begcwele isitaladi bebhikisha. ISouthern African Development Community (SADC) ayizange ikufihle ukuthi ukhetho eTanzania alubanga nobulungiswa. Abaholi abaningi eSADC abazange bawuhambele umcimbi wokufungiswa kwakhe. ITanzania lingelinye lamazwe ahlonishwayo ezwenikazi ngokuba nomlando ekulweleni inkululeko nekhaya lalabo ababengababaleki emazweni abo ngenxa yezepolitiki okuhlanganisa iNingizimu Afrika.
Ngaphambi kokuthola inkululeko lelizwe lalibizwa ngeTanganyikalibuzwa ngamaNgisi iNdlovukazi Yesibili eyayimelwe inxusa layo eTanganyika. UJulius Nyerere nguye owaba nguMengameli wokuqala emuva kwenkululeko, walandela uMengameli u-Ali Hassan Mwinyi, uBenjami Mkapa, uJakaya Kwikweta kuze kufike kowamanje.