UYAYIVUBELA: UMengameli waseRwanda uthi bakulungele ukubhekana neNingizimu Afrika
UMengameli waseRwanda uPaul Kagame uthi iRwanda ikulungele ukubhekana neNingizimu Afrika uma kunesidingo. Lokhu kulandela izinsolo zikaMengameli waseNingizimu Afrika, uCyril Ramaphosa zokuthi amavukelambuso e-M23 kanye nombutho wezokuvikela waseRwanda yibona abanesandla ekufeni kwamasosha ali-13 aseNingizimu Afrika eDemocratic Republic of Congo (DRC).
UKagame uthe uRamaphosa akazange ayixwayise iRwanda mayelana nezenzo zayo zezempi e-DRC kodwa esikhundleni salokho wacela ukwesekwa ngesikhathi eqaphela imizamo yaseNingizimu Afrika yokuletha ukuthula.
UKagame ukugcizelele ukuthi iNingizimu Afrika ayikho esimeni sokuba ngumenzi wokuthula noma umxazululi futhi waxwayisa ngokuthi uma iNingizimu Afrika ifuna ukubhekana ngeziqu zamehlo, iRwanda izophendula ngendlela efanele.
UKagame ucacise ngemininingwane yezingxoxo zakhe zakamuva noRamaphosa, wathi, “Okushiwo ngalezi zingxoxo kwabezindaba yizikhulu zaseNingizimu Afrika kanye noMengameli Ramaphosa uqobo kuqukethe ukuhlanekezela okuningi, ukuhlasela ngamabomu, ngisho namanga. Uma amagama engashintsha kakhulu engxoxweni aye esitatimendeni somphakathi, kusho lukhulu ngendlela lezi zindaba ezibaluleke kakhulu ezisingathwa ngayo.” Kuphetha uKagame