INingizimu Afrika isamukele isivumelwano sa-Israeli neHamas sokuqedwa kwempi
INingizimu Afrika isamukele isivumelwano sokuyeka ukulwa esifinyelelwe phakathi kwa-Israeli ne-Hamas ngemuva kwezinyanga ezili-15 zalokho uMnyango Wezobudlelwano Bamazwe Nokubambisana (i-DIRCO) owawubiza ngokuthi “ukuqothula kohlanga kwa-Israel eGaza” ngemva kokuhlasela kwe-Hamas ngoMfumfu ziyisi-7, kowezi-2023.
INingizimu Afrika iphinde futhi yacela ukuqaliswa kokuthula okunobulungiswa nokuhlala njalo okuqinisekisa ukuthi amalungelo abantu basePalestine nabakwa-Israel ayavikelwa futhi ayakhuthazwa.
Isitatimende se-DIRCO sithi lesi sivumelwano siyigxathu lokuqala elibalulekile ekuqedeni inkinga yobuntu ebhekene nabantu abangaphezu kwezigidi ezimbili basePalestine eGaza Strip, bekhomba isinqumo seNkantolo Yobulungisa Yamazwe Ngamazwe ebone lesi simo njengesibhicongo ngokusobala njengoba iphinde icubungula icala leNingizimu Afrika elibhekiswe ku-Israyeli.
Iphakamise ukuthi izinyathelo zesikhashana ezinikezwe yiNkantolo Yomhlaba zilandelwe umbuso ophethe, yaphinde yaphakamisa ukuthi umthetho wamazwe ngamazwe kanye nowobuntu udinga ukuhlonishwa futhi uphakanyiswe.
Uhulumeni usenxuse ukuthi zonke izithiyo ekulethweni kosizo lwesintu zisuswe ngokushesha futhi ngaphandle kwemibandela.