UNozipho nephupho lokuwenza minyaka yonke umqhudelwano wakhe
Injabulo kuNozipho Ntshangase waseNseleni eceleni kwaseRichards, kufezeka iphupho layo lokuthi yenze umqhudelwano.
Le ntokazi izokwenza umqhudelwano womdlalo womnqakiswano ewubize iNozipho Ntshangase Tournament. Lo mqhudelwano uzobanjelwa eMhlathuze Sport Complex, mhla zili-15 kuZibandlela.
Ikhuluma nelaboHlanga le ntokazi ithe: “Kusukela ngonyaka wezi-2022 benginesifiso sokuthi ngihlele umqhudelwano ozobizwa ngegama lami. Bekunzima njengoba amandla okuwuqala abengekho. Bekungekho lula ukuwuhlanganisa, ingakho bekunzima nokukhipha usuku lawo” ibeke kanje.
UNozipho ubonge uMhlathuze Netball Federation ngokumgqugquzela ekwenzeni lomqhudelwano.
“Inhloso enkulu yalo mqhudelwano ukubuyisela emphakathini engiqhamuka kuwona, kodwa okukhulu kakhulu ukugqugquzela intsha ukuba izibandakanye kulo mdlalo iyeke izidakamizwa. Maningi amaqembu azoba yingxenye yalo mqhudelwano okufaka abesifazane nabesilisa, kuphinde kube namaqembu abaneminyaka engaphansi kweli-15” kusho uNozipho.
Ubaluke ukuthi kuzobe kunezihambeli eziqhamuka eqenjini leRichards Bay FC edlala esigabeni seBetway Premiership ukuzogqugquzela intsha ezobe ikhona.
“Indawo yangakithi ayinawo umlando omuhle, ngalo mqhudelwano ngifuna intsha ikhule inothando lwezemidlalo ikhohlwe izinto ezingalungile. INozipho Ntshangase Tournament iphupho lami ngifisa ibe minyaka yonke” kusonga le ntokazi enephupho lokubuyela kwelesizwe.
KumaKZN Sport Awards waqokelwa koweSportswoman of the Year, ngeledlule kumaKZN Netball Awards khona waqokelwa koweSportswoman of the Year nowePersonality of the Year.
