Sekubhekwe elingaliyo ngeDundee July
Nakulo nyaka kuthishwa injomane iNxakanxaka ukuthi ilona hhashi elinganqoba umqhudelwano waminyaka yonke iDundee July.
Lo mqhudelwano uzobe ubanjelwe eNdumeni Horse-Racing Track, kusasa ngoMgqibelo. INxakanxaka nyakenye yiyo eyadla umhlanganiso.
Okugqamile kulo nyaka ukuthi iDundee July ihlukile njengoba kuzoba nomjaho obizwa ngoMtelebhelo we-Africa e-Africa. Kuyo kuzoqhudelana amahhashi aKwaZulu-Natal nawakwamanye amazwe. Isifundazwe iKwaZulu-Natal sizomelwa amahhashi amathathu okunguNxakanxaka, iTrouble Maker no-Album. ElaboHlanga likhulume noJoe Hudla onolwazi olukhulu lwamahhashi, ophinde awasakaze kuyona yonke imiqhudelwano ehlelwa esifundazweni iKwaZulu-Natal.
“Akukho okushintshile, kuzokwenzeka njengoba kuhlezi kwenzeka ezikhathini eziningi ukuthi injomane ehambe phambili kube uNxakanxaka. Leli hhashi ngendlela eliyiyona ngisho kungathiwa ligitshelwe ubani kodwa ilona engingahlezi ngithi lizonqoba. Into enhle ngalo liyamlalela lowo osuke eligibele, zithi zisuka libe litshengisa ukuthi libheke phambili. Nomlando-ke omuhle ngeke sawuphikisa ukuthi lenjomane iyona esinqobe imiqhudelwano eminingi, okufakazela ukuthi nakusasa yilo elizodla umhlanganiso” kusho uHudla.
INxakanxaka ngaphandle kokunqoba iDundee July phambilini ike yanqoba iSummer Cup neKing Cetshwayo June.
Eqhuba uHudla uthe: “Ikhona injomane engikholwa ukuthi inikeza iNxakanxala inkinga, nokuyilena ebizwa ngeTrouble Maker. Inkinga yeTrouble Maker ukuthi iluhlaza, inempi ongayazi! Ngikholwa ukuthi abayifundisanga isencane. Ngisho ungabuza noma ubani iTrouble Maker inamandla ayisimanga edlula yona iNxakanxaka, uma ingayeka ukungamlaleli uJokhi wayo ingayidla imihlanganiso eminingi. Kumjaho waseNkandla lavele langafuna ukunyakaza kwaba ukusala kwayo, lenza esifanayo nakuyo iDundee July nyakenye. Ngaphandle kwakhe uTrouble Maker, akhona namanye njengaleli elibizwa ngoShenge laseBergiville eseladlula emhlabeni,” kusho uHudla.
Omunye ofakazele uHudla kube uNdumiso Sikhakhane onolwazi olukhulu ngalo mdlalo.
“Ngaphandle kokusaba nje ngingayifaka yonke imali yami kuNxakanxaka, inkinga amanye amahhashi uke uthi kukhona azokwenza ngoba esuke enze kahle kweminye imiqhudelwano avele akuphoxe. Lento ayiyinhle neze, siyafuna kube nezinjomane eziningi ezibanga ukunqoba” kusho uSikhakhane. Nonyaka azoba ngama-340 amahhashi azoncintisana, bese kuba ojokhi abangama-500.
Amahhashi azonqoba azocazelana kwisamba sesigidi esiyizi-R1.5.
Kulindeleke ukuthi kugcwale phama njengoba kuzoqala kukhangiswe ngemfashini namuhla (ngoLwesihlanu) kusihlwa, kusasa kube namahhashi kuthi kusihlwa kube nedili lemiculo.
Lo mqhudelwano uxhaswe uMnyango weZemidlalo esifundazweni iKwaZulu-Natal oholwa uDkt uNtuthuko Mahlaba, Amathole Funerals, Ithala nesiFunda uMzinyathi.
ElaboHlanga liphinde lakhuluma noDecember Nkosi ongumnikazi weTrouble Maker. “Ngivele ngingazi ngempela ukuthi kwenzakalani kwesinye isikhathi uTrouble Maker uvesane agoloze, ingakho sengivele ngizitshele ukuthi uyowina uma ewina. Ithemba uvele angilahlise impela” kusho uNkosi. Le njomane (uTrouble Maker) izobe igitshelwe uDoctor Mbatha phambilini obegibela uNxakanxaka wanqoba naye imiqhudelwano eminingi.
Ngesikhathi umcimbi wethulwa emasontweni adlule, leli phephandaba libike ukuthi kuzoqhudelana amahhashi aKwaZulu-Natal nawakwamanye amazwe emjahweni, iMtelebhelo We-Afrika. Isifundazwe sizomelwa ngamahhashi uNxakanxaka, Trouble Maker no-Album. Ngaphandle kwamahhashi, kulindeleke ukuthi kube nosaziwayo nabaculi abahlukene abazonandisa.
Kulo mcimbi kungenwa mahhala.