OKUNGAPHELI KUYAHLOLA: Umnqamulajuqu wokuphela kwezinombolo ezindala kwelikaMthaniya
Kusuka ngoMsombuluko kuzobashela abashayeli abasasebenzisa izinombolo ezindala ezimotweni
NgeSonto zingama-30 kuLwezi ngumnqamulajuqu wokuphela kwezinombolo ezindala zezimoto KwaZulu-Natal ebezibalula idolobha lalapho imoto ithelelwa khona.
Kusuka ngeSonto phakathi kwamabili abanikazi nabashayeli bezimoto ezisasebenzisa izinombolo ezindala bazobhekana nokukhokha izinhlawulo okanye imoto ikhishwe emgwaqeni.
Lolu hlelo luyingxenye yolukazwelonke inational traffic information system (eNatis) olwenganyelwe iRoad Traffic Management Corporation (RTMC). Uhlelo lokushintshela kwizinombolo ezintsha lwaqala lu-1 kuZibandlela ngowezi-2023 lunquyelwe iminyaka emibili ephela ngeSonto phakathi kwamabili lu-1 kuZibandlela wezi-2025.
Kusuka kuqale uLwezi ezindaweni zikahulumeni okuvuselelwa kuzo amalayisensi nasemaposini akhethekile bekuvalwe ngomuntu kuphuthunywa umnqamulajuqu waseSonto. Izindawo ezikhiqiza izinombolo zezimoto bezivala ngale kwamahora ajwayelekile ezinye zivula nangeSonto ngenxa yabantu abaphuthuma ukushintsha izinombolo.
Phakathi kwezinombolo ebezinedumela ezizokhunjulwa njalo njengoba uphela umnqamulajuqu ngeyaseThekwini ebiyaziwa ngeND, eyaseNdwedwe iNDW eyaduma kakhulu ngesikhathi somdlalo wethelevishini iFa lakwaMthethwa eyayitetemuka “uBhekifa”, uMgungundlovu iNP, eyaseHlalankosi kwaNongoma iNND, iPortshepstone NPS, iPinetown NU ukubala nje ezimbalwa.
Izinombolo ezintsha zinamagama amabili nezinombolo ezimbili bese zivala ngoZN. Ngesikhathi lezinombolo zifika okokuqala laba likhulu isasasa, kepha abanye baqoma ukubambelela kwizinombolo ezindala. Omunye walaba uNks uPhumokuhle Mbhentse wakwaNyuswa eBothas Hill othe uzoyigcina inombolo yakhe engu NU njengoba eseshintshele kwentsha kwazise lena imoto yakhe yokuqala kuye kufana nokuqopheka komlando. Utshele leli phephandaba ukuthi ubede ezindela ukushintsha inombolo yakhe endala ngoba eyithanda kepha manje sekufike ekugcineni.
Izinombolo ezintsha zibiza phakathi kuka R350 kuya ku R420 kuye ngokushiyana kwezindawo. Ezinkundleni zokuxhumana bekuphithizela abantu bebuza izindawo ezinconywana ngokwentengo bejahe ukungaficwa emathonsi abanzi.