Ukhala ngesikhathi asihlalile engadlali obengabizwa kwiBafana Bafana
ULangelihle Mhlongo ukholelwa ukuthi lesikhathi asihlalile engabonakali edlala, mhlambe ubezolithola ithuba lokuthi abizelwe eqenjini lesizwe iBafana Bafana.
Lo mdlali waKwaMashu esigcemeni saka-D kusukela kuqale isizini yeBetway Premiership ka-2025/26 ubengadlali ndawo ngoba udaba oluthinta yena neqembu abelidlalela phambili iRichards Bay FC belusasenkantolo.
Ekuqaleni kweSonto ube esethulwa ngokusemthethweni AmaZulu FC, okwake kwavela phambilini ukuthi kade exoxa naye.
“Kube isikhathi esinzima kakhulu lesi kumina, ngoba bengivimbelekile ekutheni ngenze into engiyithandayo okuwukudlala ibhola. Lesikhathi ngingadlali singilimaze kakhulu ngoba mhlambe nami bengizolithola ithuba lokugqoka ijezi leBafana Bafana. Indlela ebengidlala ngayo kuyophela isizini edlule, ifmo yami ibiphezulu kakhulu” kusho uMhlongo.
UMhlongo njengoba ejoyine AmaZulu FC ubesehlale amasizini amane kwiRichards Bay FC abesephenduke insika yayo esiswini.
“Ngiyabonga kakhulu kwiRichards Bay FC ngokunginika ithuba lokuthi ngidlale esigabeni esiphezulu. Ukujoyina kwami-AmaZulu FC kungithokozise kakhulu ngoba kusho ukufezeka isifiso sikaBaba ongizalayo uHlalanathi Khuboni, owayehlezi efisa ukuthi ngidlalele leli qembu elinomlando ojulile kwazise wabe engumlandeli wokuqina Ngilandele kumagama abadlali abadala abaqhamuka KwaMashu okubalwa uJoel Faya” kusho uMhlongo.
Kwabanye abadlali abaqhamuka KwaMashu abaseke bagqoka ijezi loSuthu kubalwa uTsepo “Maraizer” Ntsoane, uJulius Chirwa, uMdu Nxele, uNtokozo “Koloba” Sikhakhane, uMusa Langa, uMalombo Sibiya, uNhlanhla “Shakes” Zwane, Eric “Ndunakandaba” Ngidi noSifiso “Padayachee” Gcaba.
“AmaZulu FC iqembu elikhulu kuningi engizokufunda njengoba ngizodlala kuwona. Okuhle ukuthi baningi abantu abawathandayo ngalokho baningi abantu asebezonginaka uma ngidlala” kubeka uMhlongo.
Phambilini umnewayo wakhe uMhlongo uNkanyezi Mhlongo udlalile kwizinkulisa zoSuthu kodwa manje udlala kwiDurban Pioneers edlala kwiSafa KZN ABC Motsepe League.
UMhlongo uthe kulesikhathi esidlule ubabonile abantu abamthandayo nabaqoke ukuhlehla kuyena njengoba kade kungekho lapho abedlala khona.
Uphinde wabonga uSandile Zungu onguSihlalo walo Usuthu ngokuthi amamukele kahle kanye nabo bonke abadlali beqembu.
Kusasa ngoMgqibelo Usuthu luzovovana inkani neSiwelele FC kumdlalo weBetway Premiership ozokuba seMoses Mabhida Stadium ngele-15:30.