ILamborghini eyokuchitha imali kwasebewele ngelibanzi
Kwelinye lamaBhuku aseNgilandi iClassic & Sports Car elinomlando omude wokubhala ngezimoto nobuchwepheshe bazo, uma omunye wababhali balo egeqa amagula ngohlobo lwezimoto zakwa Lamborghini emuva kokuvivinya ezimbili ubhala uthi, “Wuhlobo lwemoto oluthengwa ngabantu abasuke sebenakho konke empilweni, sebephelelwe nawukuthi inkece abanayo bazoyisebenzisa kanjani”
Kubantu ababulalayo emhlabeni abahamba ngalolu hlobo lwemoto ngosaziwayo kwezikaqedisizungu nalabo abakwezemidlalo imali abayicaphuna ngamafosholo.
ElaboHlanga libheka ngeso elibanzi iLamborghini emuva kwesigameko sokugasela kophiko oludla impahla emzini wenjinga kasomabhizinisi eSandton eGoli lashaqa izimoto ezintathu zohlobo lweLamborghini. Sekungumlando ukuthi lezimoto zikamacaphuna kusale uHanguane Maumela zishaqwe i-Asset Forfeiture Unit (AFU) ebihambisana neSpecial Investigative Unit (SIU).
UMahaumela usolwa ngokuba sekhaleni lenkohlakalo yethenda yezigidigisi ezi-2 esibhedlela iTembisa Hospital, eGoli. Kulezimoto kukhona iLamborghini Urus, iLamborghini Aventador SVJ, iLamborghini Huracam. Ezinkundleni zokuxhumana abantu basababaza namanje ngobukhazikhazi bezimoto. Babodwa abathi bazibona okokuqala, abanye bababaza ukuthi kungani lo somabhizinisi ekhethe umbala ofanayo kuzona zontathu oluhlaza okwesibhakabhaka. Ngokujwayelekile “iLambo” okuyigama eteketiswa ngalo ivamise ukuthi ibe ngumbala obomvu okanye osawolintshi.
Kuvundululwe amaLamborghini akamuva
Lolu hloibo lwezimoto ezakhelwe ijubane, ubuchwepheshe obusezingeni lezinjini nesitayel. Ezimotweni ezishaqwe kulo muzi kukhona iLamborghini Urus yonyaka wezi-2022 kodwa eqale ukudayiswa emazweni aphesheya ngowezi-2020. I-Urus uma iyintsha ibiza ngaphezulu kwezigidi ezi-5.5.
Le moto inobhememe lwenjini engu 4.0 litre, 8 speed , V8 twin turbo edonsa ngawowonke amasondo. Akuyona nje imoto eyakhelwe ukuhamba emigwaqeni ejwayelekile ngenxa yesakhiwo sayo esiyivumela ukuba ihlale isejubaneni. Ngemizuzwana nje eli-11.2 iyakwazi ukufinyelela ku 200km ngehora.
Emhlabeni kubantu abahamba ngale moto kubalwa umculi owaba nedumela ngokusaphaza imali uJustin Bieber nendodakazi yeNkosi yaseMonaco. Igama likaMaumela liphakathi kwalaba abakhethekile abahamba ngalolu hlobo.
ILamborghini Huracan angeke wayifanisa ngisho nebhanoyi laphansi ngoba ihamba yodwa. Yona itholakala nezicabha ezimbili nenjini engu 5.2 litres. Ikhiqiza amandla afinyelela ku 470Nm. Uma lemoto iyintsha sha ngokwemali yaseNingizimu Afrika ifinyelela ezigidini ezi-8.7.
Ngokomlando wayo akumele injini yakhona kuze kubhele izinsuku eziyisikhombisa ingafunyezwa noma ingene emgwaqeni.Akulona uhlobo lwemoto ongathi ulufihlila umakhelwane ngoba injini yakhona uma izamula kuvuka wonke umuntu esigcemeni. Intandokazi yomculi wakhesheya kwezilwandle uNicki Minaj kubikwa ukuthi usanda kushintshela kuyona ephuma kwiLamborghini endala i-Urus.
Hlobo luni lwezimoto lolu zakhiwaphi?
Umsuka weLamborghini ukwelamaNtaliyane, kuze kube yinamuhla emhlabeni jikelele ayikho enye imboni lapho lemoto yakhiwa khona. Ngokujwayelekile izinkampani zezimoto zikhiqiza izimoto ezingama-600 ngosuku kuya phezulu, kodwa ukwakha iLamborghini eyodwa nje kuthatha izinyanga eziyisithupha. Uma usufake i-oda lale moto awuyitholi ngaleso sikhathi njengoba kuvamisile kwezinye izinhlobo. iLamborghini ilindwa isikhathi esingangonyaka. Kulabo macaphuna kusale abathenga le moto, abanye babo bayaye bathathe neholidi lesikhashana e-italy befuna ukuyozikholisa bayibuke bukhoma yakhiwa.
ILamborgini izakhele kakhulu umalndo emjwahweni iFormula 1 idlisela ogageni iFerrari. Akulona uhlobo lwemoto lokuthengwa ngemali yokugcina ngoba ukuyinakekela zinyanga zonke kuyafika kuma-35 000.
Owayengusomabhizinisi wakuleli uMandla Mthembu osanda kulandulela leli wagcina eliphonsile ithawula kweyakhe neyomkakhe wangaleso sikhathi uKhanyi Mbau ngenxa yokwehluleka ukumelana nezindleko zayo.