ULarsen usezoqeqesha iVenda FC
UClinton Larsen kuvela ukuthi nguyena ozobe ehlezi ebhentshini leVenda FC njengomqeqeshi omusha uma kuqala isizini yeMotsepe Foundation Championship (MFC) ka-2025/26.
Lo mqeqeshi oneminyaka yobudala engama-54 nonamava amakhulu, isizini edlule iphele engasaqeqeshi qembu njengoba maphakathi nesizini wesula ekuqeqesheni iMagesi FC.
IMagesi FC wabe esuke nayo kuyona iMFC wayinyusela kwiBetway Premiership, nalapho afike anqoba nayo indebe yeCarling Knockout.
“Emasontweni amabili edlule kungoLwesihlanu uLarsen waba nomhlangano eGoli nosihlalo weVenda FC, nalapho izingxoxo zafike zahamba kahle. Okwenza ngiqinisekise lokho ingoba kukhona nabadlali asebeshayelwa uyena usihlalo waleli qembu ngenhloso yokubanikeza izinkontileka. Labo badlali abasebenze kahle uLarsen kula masizini adlule” kusho umthombo.
ULarsen ngokuthatha lo msebenzi uzobhekana nomqansa wokuguqula indlela leli qembu elenze ngayo ngesizini edlule, njengoba liqede endaweni ye-14 kulogi.
Lo mqeqeshi akalona ivukane ekuqeqesheni njengoba waqala ngonyaka wezi-2010 eqeqesha iBloemfontein Celtic, ube eselandela kwiMaritzburg United, iRoses United, iLamontville Golden Arrows, iChippa United, iPolokwane City neSummerfield Dynamos.
“Ngeke ngamangala uma iVenda FC isayinisa abadlali baseThekwini noma asebenzile nabo uLarsen, ngoba into ahlezi eyenza leyo. KwiMagesi FC walanda uMncendisi Vandala, uSamuel Darpoh, u-Anathi Ngwadla noDeolin Mekoa asebenza kwaba uFiston Kwabanga ongumqeqeshi wonozinti bonke asebenze nabo kwiSummerfield Dynamos” kubeka umthombo.