Ngabe izophinde iphoxe yini iChiefs eThekwini
IKaizer Chiefs nethuba lesibili lokushiya abalandeli bayo baseThekwini namaphethelo bethokozila, ngokuthi ithole amaphuzu agcwele.
Leli qembu lizotholana phezulu neSekhukhune United eMoses Mabhida Stadium, lo mdlalo weBetway Premiership uzokuba ngeSonto ngele-15:30 ntambama.
Kumdlalo owedlule obukhona eThekwini, iChiefs iphoxe abalandeli bayo abaphuma ngobuningi babo yize imvula yabe inetha ngenye indlela. Kulowo mdlalo yaguqa ngegoli elilodwa eqandeni kwiLamontville Golden Arrows.
Lo mdlalo ngeke ube lula neze kwiChiefs kwazise idlala neqembu ngokomlando uma bebhekene kuba nzima ukuba belehlule.
Emidlalweni eyisithupha la maqembu etholana phezulu iChiefs inqobe imidlalo emithathu, iSekhukhune United yanqoba emibili badlala ngokulingana kowodwa.
ISekhukhune United iza kulo mdlalo ihambela phezulu njengoba kowedlule ikwaze ukunqoba ngamagoli amathathu eqandeni ihlula iSuperSport United.
Izitobha zeChiefs zinomqansa wokuqapha u-Andy Bobwa Boyeli okunguye ovalele amagoli amathathu ngeledlule. UBoyeli unamagoli amahlanu emdlalweni eli-11 kwiligi kule sizini.
Umgadli weChiefs uRanga Chivaviro unomqansa wokuthi uma ethola ithuba kulo mdlalo ashaye igoli noma amabili, kwazise kumdlalo odlule abalandeli babemhhehhemeza bethi akaphume ekubeni wabe esuka ebhentshini.
Kulogi iChiefs emidlalweni eli-13 isendaweni yesithupha ngamaphuzu ali-18, kanti iSekhukhune United yona ikweyesithathu ngamaphuzu angama-23 emva kwemidlalo eli-12.
Imidlalo yeBetway Premiership ihlelwe kanje:
Namuhla:
- ISupersport Utd vs Polokwane City, eLucas Moripe Stadium ngele-19:30.
- ICape Town City vs Richards Bay FC
eCape Town Stadium ngele-19:30.
- Kusasa:
ILamontville Golden Arrows neTS Galaxy eMpumalanga Stadium ngele-15:30. - IChippa United vs Marumo Gallants eBuffalo City Municipality Stadium, ngele-20:00.
NgeSonto
- IKaizer Chiefs vs Sekhukhune United eMoses Mabhida Stadium ngele-15:30.