IDurban Pioneers iqinisa ngabadlali abaphuma kwi-PSL

UMaphumulo uyintatheli yezemidlalo.

IDurban Pioneers egijima kwi-Safa ABC Motsepe League KwaZulu-Natal iqinise isikwati sayo ngabadlali akade begijima kwi-Premier Soccer League (PSL).

Ngokuthola kwelaboHlanga lithole ukuthi u-Abel Mabaso noSinethemba Mngomezulu bakuleli qembu laseThekwini.

UMabaso oyibamba esiswini noneminyaka yobudala engama-33 udlalele amaqembu amaningi kwi-PSL okuyiMpumalanga Black Aces, i-Ajax Cape Town, iMaritzburg United, iChippa United, i-Orlando Pirates neRichards Bay FC okuyiyo agcine ukubonakala kuyona edlala.

UMngomezulu yena ongumgadlu oneminyaka yobudala engama-25 ugcine esemabhukwini eHighbury FC ekuMotsepe Foundation Championship (MFC), uphinde wadlala nakwiStellenbosch FC, uThongathi FC, iTS Galaxy neRichards Bay FC.

“Kusekuncane lokhu baningi abadlali akade bebonakala kwi-PSL abazobonakala bejoyina leli qembu. USihlalo walo uzokwenza konke ukuthi likhuphukele kwi-MFC ngesizini ezayo, ingakho elanda abadlali abanamava” kusho umthombo.

ElaboHlanga liphinde lathola ukuthi leli qembu lizobuyisa uThami “Kroos” Dladla obengumqeqeshi walo phambili, ngaphambi kokuthi amiswe.

Isamukele ngenjabulo isipho sikayise iChiefs

Kusasa iDurban Pioneers kusasa ngoMgqibelo ngele-11:30 izotholana phezulu no-Umvoti FC koweKZN ABC Motsepe League Pre-Season Tournament. Komunye umdlalo iKwaMashu Durban Knights FC yona izobhekana noMsinga United FC ngehora lesi-9 ekuseni.

Isanalo ithuba lokuthi inqobe uqoqo A, njengoba ihlezi endaweni yesine kulogi ngamaphuzu ali-14 emvakwemidlalo eyi-9. Iqembu eliphezulu kuleli qoqo iNjampela enamaphuzu ali-19.

Kuzo ezithinta i-ABC Motsepe League KwaZulu-Natal:

UCebo Mchunu obebolekiswe i-Orlando Pirates kwiMilford FC uziqeqesha noMkhambathi FC, omunye ozilolonga naleli qembu uThamisanqa Sangweni yena obekuMsinga United FC.

Ulundi United FC luqinisekise ukuthi uMpumelelo Mpanza usengumqeqeshi walo. Lo mqeqeshi obeqeqesha Umsinga United FC neYoung Elephants uzolekelelwa uBheko Nkosi oke waba kwiNjampela FC.

UKai-Kai Mhlungu obeqeqesha Umlazi Young Lions wesule isigubhukane kuleli qembu laseMlazi.