Ziphinde zanqoba izintokazi zakuleli kweYoMhlaba
Iqembu lakuleli lekhilikithi labesifazane labaneminyaka engaphansi kweli-19, liqhubekile nokwenza kahle kwimidlalo yeNdebe YoMhlaba.
KuleNdebe YoMhlaba ye-T20 ebanjelwe eMalaysia elakuleli selidlale imidlalo emibili kuyona yomubili linqobile.
Kumdlalo wokuqala obungoMgqibelo elakulile lihlule iNew Zealand ngama-runs angama-22, kobubanjelwe eBorneo Cricket Ground, eSarawak.
Namuhla elakuleli lizidlele emahlandla lihlula iSamoa ngamawikhethi ali-10.
Kulo mdlalo iNingizimu Afrika inqobe iToss, yabe isiqoka ukuba kube yiyo eshwibayo ibe isikhipha yonke iSamoa isabeke amaruns ali-16 ebhodini.
Kulo mdlalo kugqame uNtshabisengi Nini ogcine eqokwa njengomdlali ovelele, ngokushaya amawikhethi amathathu besamushayele amaruns amane kuphela.
Ukunqoba kweNingizimu Afrika imidlalo emibili kusho ukuthi iqhwakele phezulu kuqoqo C, ngamaphuzu amane emidlalweni emibili. Iqembu elilele endaweni yesibili iNigeria yona enamaphuzu amathathu.
La mazwe azotholana phezulu kumdlalo wokugcina wamaqoqo ngoLwesithathu, ngele-10:30.
Lona unyaka wesibili ukhona lo mqhudelwano njengoba waqala ukusingathwa iNingizimu Afrika ngonyaka wezi-2023. I-India iyona evikela isicoco njengoba yehlula i-England kowamanqamu.