Osonkontileka bakagesi eThekwini basabisa ngokubeka phansi amathuluzi
Osonkontileka bakagesi abaqashwe nguMasipala weTheku KwaZulu-Natal basabisa ngokuthi bazobeka phansi amathuluzi ngoMsombuluko uma idolobha lihluleka ukubaholela.
Abanye balaba sonkontileka bathi sekuphele izinyanga ezine bengakhokhelwa wumasipala. Bahlangane ngaphandle kwehholo leTheku befuna umhlangano neziphathimandla zikamasipala.
UMengameli wophiko lwabasebenzi bakagesi kuMasipala weTheku, uBandile Sibiya uthe, “Sithumela umyalezo kuziphathimandla zikamasipala ukuthi kusukela ngoMsombuluko wesonto elizayo sizobeka phansi amathuluzi. Ngeke sikwazi ukuqala noma yimuphi umsebenzi uma bengakwazi ukuxazulula le nkinga, ikakhulukazi ebalulekile okungamaholo ethu. Kumele siyithole le mali, sikhumbule lesi sikhathi samaholidi, ngesikhathi samaholidi kufanele sijabulise imindeni yethu kodwa siyehluleka ngoba umasipala awusikhokhelile ngomsebenzi esiwenzile.”
Khonamanjalo, iMeya yeTheku uMnu uCyril Xaba uthe isigungu esiphezulu sedolobha siyalubheka lolu daba.
“Umthetho uthi kumele sikhokhele osonkontileka bethu zingakapheli izinsuku ezingama-30 sikhiphe ama-invoice. Ngakho-ke, wudaba esilubhekile, wudaba esiluqaphe ngeso lokhozi njengoba isigungu esiphezulu nesigungu esiphezulu salo mkhandlu kanye nomphathi wedolobha lethu bebika ukuthi senza kahle kangakanani esihlokweni sethu sokuqinisekisa ukuthi siyakhokha. abahlinzeki bezinsizakalo zingakapheli izinsuku ezingama-30.”
