UMaimane usegxeke indlela uhulumeni asingatha ngayo inselelo yamanzi ezweni
Umholi weBuild One South Africa (BOSA) uMmusi Maimane uthe indlela uhulumeni asingathe ngayo indaba yamanzi ekhona ikakhulukazi eDolobheni laseGoli, ifana ncamashi nalendlela asingathe ngayo eyokunqamuka kukagesi.
UMaimane ubetshela abezindaba eGoli ngomsebenzi weqembu lakhe ePhalamende naseGauteng kulo nyaka.
Njengamanje iDolobha laseGoli libhekene nenkinga yamanzi osekuphele izinsuku izakhamuzi zingenawo amanzi ngenxa yokuntengantenga kwengqalasizinda yamanzi. UMaimane uthi uhulumeni uyehluleka ukusingatha lendaba yamanzi.
“Iqiniso lithi inkinga yamanzi bayisingatha ngendlela abasingatha ngayo inkinga kagesi. Leyofilimu izofana. Leya filimu iyifilimu … ekuqaleni uzovala amanzi,” kusho uMaimane.
UMaimane uthi iqembu lakhe lizoqhubeka nokulwa nekhabhinethi kahulumeni. Njengamanje kunongqongqoshe abangama-32 namaphini angama-43 abaqokwe nguMengameli Cyril Ramaphosa ngemuva kokhetho lwangomhla zinga-29 kuNhlaba.
UMaimane uthi uhulumeni angawaqeda nya amaphini ongqongqoshe. “Yithina sodwa iqembu namuhla, esilwela ukuncishiswa kwekhabhinethi. Ngicabanga ukuthi asiwadingi amaphini ongqongqoshe. Lokhu ukuqinisekisa ukuthi isabelomali sakho sihambisana nabasebenzi obatholayo,” kuchaza uMaimane.
