Inhlangano i-Defend our Democracy ifuna kuxoshwe uNgqongqoshe

UMtaka ungumbhali wezindaba zamazwe neMeneja kwi-Igunundu Agency.

Inhlangano ezimele, iDefend our Democracy ithi isinqumo sokuyisa uNgqongqoshe uThembi Simelane eMnyangweni wezokuHlaliswa kwaBantu, esikhundleni sokumxosha, siwukungalungi ezweni. UNgqongqoshe uSimelane usolwa ngokuba nesandla odabeni lwaseVBS kanti kusolwa ukuthi wayephila impilo yobukhazikhazi ngesikhathi esayiMeya yasePolokwane eLimpopo.

UMqondisi Omkhulu wale nhlangano uZaakirah Vadi uthi uMengameli Cyril Ramaphosa kumele athathe izinyathelo ezinqala, ikakhulukazi manje phakathi nesonto lenkohlakalo.

“UNgqongqoshe uSimelane ube nemibuzo ngobuqotho bakhe ngesikhathi eseMnyangweni wezoBulungiswa nokuThuthukiswa koMthethosisekelo. Leyo mibuzo ayikashabalali njengoba eseMnyangweni wezokuHlaliswa kwaBantu, kusamele aphendule emphakathini mayelana nezindaba ezixhunyaniswa neVBS okuphekwa ngazo, kanye nezinsolo ezisanda kuvela kwabezindaba mayelana nendlela yokuphila yakhe ekuthiwa iwubukhazikhazi.”