IRich Boyz ilungiselela isizini ezayo ngokuqinisa iqembu
Iqembu lasesifundazweni iKwaZulu-Natal iRichards Bay FC kubukeka ifuna ukukugwema okuyivelele ngesizini edlule njengoba ilokhu iqhubeka nokuqinisa isikwati sayo.
Ngesizini edlule leli qembu likaSifiso “Jomo’ Biyela, liqede endaweni ye-15 nokwenze layodlala imidlalo yokuhlunga ngenhlanhla lakwazi ukuphinde libuye kuDStv Premiership.
Njengoba likwazile ukukhokha imali eyizinkungwane ezingama-R230 likhokhela u-Ovella Ochieng, kwenze lakwazi ukuthi lisayinise abadlali ngokuvunyelwa umthetho waka-Fifa.
Kjyimanje iRichards Bay FC isisayinise uSbani Khumalo noFezile Gcaba ebathole ngesikhathi kudlala umqhudelwano waminyaka yonke iKhabba Cup.
Laba badlali ngesizini edlule bebedlalela uMkhumbane Classic kaSthembiso “Mashalofu” Mabaso okuyiqembu eligijima kuSafa ABC Motsepe League esifundazweni iKwaZulu-Natal.
Elayizolo lishone iNatal Rich Boyz (iRichards Bay FC) ngezindaba zokuthi isisayinise uTlakusani Mthethwa obekuMoroka Swallows FC esanda kudayisa ilungelo lokudlala kwiDStv Premiership kuMarumo Gallants.
Omunye umdlali okuvela ukuthi uzojoyina leli qembu uSiyethemba Sithebe osanda kudedelwa iKaizer Chiefs.
USithebe phambilini uke wadlala eqenjini lakhona KwaZulu-Natal okunga-AmaZulu FC.
Kuthiwa uSithebe uzoqala ukuziqeqesha naleli qembu njengoba kusasa liqala ukuzilungiselela isizini ezayo.
UMthethwa noSithebe bobabili badlala esiswini bazofike bebange ijezi noTercious Malepe, uBoikanyo Komane, uLangelihle Mhlongo, uBandile Ndlovu noMoses Mthembu.
Leli qembu lisanda kuhlukana noSanele Barns ojoyine iStellenbosch FC, omunye u-Abel Mabaso.
Kuzomele lithathe isinqumo ukuthi lihambisa bani phakathi kukaThabani Dube noSibusiso Mthethwa, kwazise badlala indawo eyodwa kanti basanda kusayina uGcaba naye odlala indawo efanayo nabo.
