Izithunywa zamazwe ezingaphezu kwama-40 zihambele umngcwabo kaMengameli wase-Iran
Izithunywa zakwamanye amazwe ezingaphezu kwama-40 ezisemazingeni enhloko yombuso, ongqongqoshe bezangaphandle kanye nezinhloko zePhalamende zihambele inkonzo yomngcwabo kaMengameli wase-Iran ongasekho u-Ebrahim Raisi eTehran.
URaisi, obephakanyiswa njengongase athathe isikhundla soMholi Ophakeme u-Ayatollah Ali Khamenei, ushone engozini yendiza enophephela emhlane ngasemngceleni wase-Azerbaijan ngeSonto. Indiza ibithwele noNgqongqoshe Wezangaphandle uHossein Amir-Abdollahian nabanye abayisithupha.
Umholi ophakeme wase-Iran u-Ayatollah Ali Khamenei wenze imikhuleko eTehran. Leli lizwe eliseNtshonalanga ye-Asia belivalelisa uMengameli walo ongasekho u-Ebrahim Raisi kanye nezinye izikhulu eziphezulu. Izixuku zabantu bezigcwele enhlokodolobha yase-Iran.
I-United States of America ithe ayinalo ulwazi ngembangela yokuphahlazeka kwendiza enophephela emhlane. UNobhala Wezokuvikela e-USA uLloyd Austin uthe, “Ngeke ngicabange ukuthi bazosolani, futhi, kufanele benze uphenyo ukuze babone ukuthi yini imbangela yengozi. Kungaba izinto eziningi, ukwehluleka kwemishini, iphutha lomshayeli kuningi kakhulu.”
I-Iran isimemezele izinsuku ezi-5 zokuzila kanti amanye amazwe afana ne-India, iLebanon, kanye ne-United Nations, aphephezelisa amafulegi awo phansi ukuhlonipha abangasekho. URaisi kulindeleke ukuthi angcwatshwe edolobheni lakubo eMashhad empumalanga ye-Iran namhlanje.