Intaka izobe ibekelwe amazolo engadini yezimila ngosuku lwenzalabantu eThekwini
Bazobe beqhilika izihlathi omama edilini lomculo elizoba seBotanic Gardens, eThekwini ngesonto zili-12 kwephezulu.
Le ndumezulu yomcimbi elindelwe ngabomvu ibizwa ngeDurban Mother’s Day Concert: The Old Mutual Music at the Lake, kanti iwuchungechunge lomcimbi olwenziwa njalo ngonyaka esifundazweni iKwaZulu-Natal. Imindeni nabathandi bobumnandi abazohambela lekhonsathi yomculo bazokhomba ngophakathi njengoba kuboshelwe izinkatha zabaculi abazonandisa ngalolusuku okukhona kubo nezihlabani zeMango Groove abadume ngesigqi sePop, iRock nomculo wesintu waseNingizimu Afrika.
Abakhonze amahlaya bazohleka baze baphunyuke njengoba usomahlaya u-Aaron McIlroy ezobe enza adume ngakho, nokuzokwenza abantwana nentsha iwuthokozele ngokufanayo lo mcimbi.
UClaire Johnson weMango Groove uthe akukho okumjabulisa njengokubuyela eDurban Botanic Gardens ukuzothokozisa abathandi bobumnandi. “Kusijabulisa kakhulu ukubuyela kulendawo enhle ngendlela eyisimanga. USuku Lomama luyithuba elihle lokuhlonipha uthando, ukuzwana nokuthobelana,” kusho uJohnson.
I-Old Mutual Music at the Lake yenziwa iminyaka eyahlukahlukene lapho abathandi bethokozela idili lomculo emini, endaweni evulelekile ngamaSonto emini kuze kube ntambama. Kulokhu izobe ibanjelwe echibini eliseDurban Botanic Gardens nokungenye yezingadi ezinkulukazi ezwenikazi i-Afrika nezihlabahlose ngobuhle bezimbali nezihlahla eziyikhaya lezimvemvane nezilwanyana ezincane eziba sezingadini.
Ephawula ngalo mcimbi uNks uThobile Tshabalala oyiHead of Brand kwa-Old Mutual uthe bakholelwa kakhulu emculweni njengendlela yokuhlanganisa abantu, babe nesikhathi esimnandi. “I-Old Mutual ixhasa iMusic at the Lake ngoba lokhu kuyingxenye yesethembise sethu ekugqugquzeleni ubumbano emiphakathini yethu nokuqhakambisa ukwehluka kwamasiko nomlando wethu. Seseka lolu chungechunge njengendlela yokuzinikezela emkhakheni wobuciko nasemiphakathini esiyisebenzelayo. Siyazigqaja ngokwakha indawo lapho ubuciko, amancoko nenjabulo yemindeni kuseqhulwini, ikakhulu endaweni enomlando eThekwini njengeBotanic Garden,” kuphetha uNks uThobile.
Abazombela lo mcimbi bayanxuswa ukuba baziphathele ukudla neziphuzo zabo (iziqandisi zizokhokhelwa ama-R50 esangweni), amabhayi okwembatha nezihlalo – ukuze bezothokozela ukwendlaleka kwengadi belalele imvunge emnandi. Bazophinde babone izinyoni ezahlukahlukene ezihlala kule ngadi ezizobe zilokhu zilekelela ngemiculo yazo, zindizela emoyeni.
Amathikithi ayatholakala eWebtickets,ngamanani ahlukahlukene aqala e-R195 kuya ema-R250 (abadala), awezingane ezingaphansi kweminyaka eli-12 aqala e-R100 kuya e-R120, bese awojahidada abangaphansi kweminyaka emine eba i-R10.
