UMhlakwana uyena owenze nginqobe lo mjaho – Pulinyana
ULekhothla Pulinyana obe ngumpetha wePrince Mangosuthu Ultra Marathon 52km kwabesilisa ubonge uNkosikhona “The Pitbull” Mhlakwana ngobuchule amuphe bona ukuze anqobe lo mjaho.
UMhlakwana waba ngumpetha wayo iPrince Mangosuthu Ultra Marathon 52km ngonyaka wezi-2021. Lo mjaho bekungokokuqala ugijinywa ngaphandle kukaMntwana waKwaPhindangene okhothame nyakenye.
UPulinyana waseQacha Sneck, eLesotho unqobe lo mjaho ngesikhathi esiwu-03:01:00.
“Ngibonga kakhulu kumqeqeshi wami uProdigal Khumalo, noMhlakwana ekade ngiziqeqesha naye ngizilungiselela lo mjaho. Ngaphambi kwalo mjaho uMhlakwana ungiyalile wathi kumele ngigijime ngendlela lena engiziqeqeshe ngayo” kusho uPulinyana.
Uthe njengoba kade bebeziqeqesha ezintabeni zaseHowick okuyilapho kuzalwa khona uMhlakwana.
Nyakenye lo msubathi oneminyaka yobudala engama-32 waphuma endaweni ye-12.
“Ngiqoke ukuziqeqesha noMhlakwana ngoba lo mjaho uke wawunqoba phambilini. Ungiyalele ukuthi mange ngafika ebangeni lika-42km, nginyuse indlela yami yokugijima ngize ngiyofika lapho kuqedwa khona,” kubeka uPulinyana.
Ngokunqoba kwakhe lo mjaho ugoduke nezinkulungwane ezili-R100. Kwabesifazane khona kunqobe uShelmith Muriuki waseKenya (03:18:55).
Ebangeni lika-21km kunqobe uKamohelo Mofolo (1:06:36), kwabesifazane kwaba uBlandina Makatisi (1:1759). Kwelika-10km uThabang Sekonyela (33:27) noNthabiseng Letokoto (41:24).
“Umjaho olandelayo iComrades Marathon, engibheke lukhulu kuwona. Kuzobe kungokokuqala ngiyigijima. Ngisazoqhubeka ngiziqeqeshe naye uMhlakwana, owathi eqala ukuyigijima iComrades waqeda endaweni ye-11” kusho uPulinyana.
UMhlakwana umbongele kakhulu uPulinyana ngokunqoba lo mjaho.
“Ngiyambongela kakhulu umnewethu, sijima naye ukunqoba kwakhe impela kungenza ngizigqaje. Uyazimisela uyahlonipha, nomqeqeshi uKhumalo ujabule ngendlela eyisimanga” kusho uMhlakwana.
