Iphinde yahlabana ngofishi omkhulu iHollywood AC
IHollywood Athletics Club (AC) nakulonyaka iphinde yahlabana nofishi omkhulu, lowo intokazi esizakhele igama kwezokusubatha uGerda Steyn.
Lokhu okwenziwe ileli qembu kuwukulungiselela unyaka wezi-2025 ekutheni lenze kahle emijahweni kakhulukazi lena emikhulu. UGerda uthulwe emthethweni njengomsubathi omusha weHollywood AC izolo eHollywoodbets Greyville Racecourse, eThekwini.
IHollywood AC unyaka wesithathu lona kulandelana ukuthi ithule umsubathi onegama elikhulu kwezokusubatha. Ngonyaka wezi-2023 yasayina u-Irvette Van Zyl onomlando wokwenza kahle kuma-Olympics wanqoba ne-Africabank Soweto Marathon, nyakenye kwaba uStephen Mokoka osebuya kuma-Olympics.
UGerda njengoba ejoyine iHollywood AC usuka kwiPhathane AC yaKwaZulu-Natal okuyikilabhu eyasungulwa ngowezi-2013 uMdu Khumalo.
Le ntokazi eneminyaka yobudala engama-34 izakhele igama ngokumela iNingizimu Afrika kuma-Olympics, yaba ngumpetha weComrades Marathon amahlanda amathathu yaphinde yaba ngumpetha weTotalsports Two Oceans kahlanu.
Kule kilabhu ujoyine abasubathi okubalwa uNkosikhona Mhlakwana, uCarla Molinaro noLoveness Madziva ukubalwa abambalwa, bonke labasubathi benza kahle kahulu.
“Kungithokozisa kakhulu ukujoyina iqembu le-Purple (Okuyimbala yeHollywood AC), bengilokhu ngikugcina njengemfihlo emasontweni ambalwa edlule ekugcineni ngikuvezile namuhla. Kuzoba unyaka ojabulisayo lona. Nginethemba lokukhuphula iqembu ekutheni lenze kahle, ngiphinde ngikhuthaze abagijimi abaningi ukuthi bajoyine le kilabhu. Nginezizathu eziningi zokuthi ngijoyine ikilabhu kodwa uthando abanalo ngalo mdlalo yisona sizathu esingilethe lapha” kubeka uGerda.