U-Ellis uzothweswa iziqu zobudokotela ngegalelo lakhe kunobhutshuzwayo

Uzohlonishwa ngeziqu zobudokotela umqeqeshi weBanyana Banyana uDesiree Ellis.

Lezi zindaba zivele esitatimendeni esithunyelwe yiSouth African Football Association (Safa) izolo ebusuku.

Osukwini lwakusasa u-Ellis uzobe esohlwini lwezifundiswa eziyizinkulungwane eziyisikhombisa ezizothola iziqu emikhakheni eyahlukene eNyuvesi yaseCape Peninsula University of Technology.

Umcimbi wokugqokwa kwamajazi uqale ngoMsombuluko kule nyuvesi yaseKapa kanti uzophothulwa ngoLwesihlanu.

NgoLwesine u-Ellis uzonikwa iziqu zobudokotela ngenxa yegalelo lakhe ebholeni likanobhutshuzwayo kwabesifazane.

Kusukela kusasa usezobizwa ngodokotela uDesiree Ellis. Ngowezi-2022 wenze ezibukwayo ngesikhathi esiza iBanyana ekutheni yekhale yemuke nesicoco se-Africa Cup of Nations (Afcon) kwabesifazane.

Udle iMorocco ngo 2-1 phambi kwabalandeli bayo. Ngokwenza lokhu ube ngumqeqeshi wokuqala ukuhlabana ngesicoco seWafcon.

Kuthe kusabatshazwa lokho wathatha iqembu lesizwe walifaka kuLast 16 eNdebeni YoMhlaba yabesifazane.

Nalapho ube ngowokuqala ukusiza iqembu lesizwe lakuleli ukuzibekisela indawo kweyemikhumulajezi yeNdebe YoMhlaba.

Impumelelo ka-Ellis ibala nokuqokwa amahlandla amane njengomqeqeshi ovelele e-Afrika emiklomelweni yeConfederation of African Football (Caf).

Nangonyaka odlule u-Ellis uchonywe uphaphe legwalagwala nguMengameli wesizwe uCyril Ramaphosa emnika indondo yegolide ebizwa nge-Order of Ikhamanga ngenxa yagalelo lakhe kwezemidlalo.