Sesiside isikhathi ngiku-Arrows: OwaseGudunkomo

ILamontville Golden Arrows ebhinjelwa izinto izoshiywa umdlali wayo omqoka uma kuphela isizini. 

Loyo mdlali nguVelemseni “Diski Dance” Ndwandwe (owaseGudunkomo), njengoba kuvela ukuthi ngeke ayivuselele inkontileka yakhe uma kuphela isizini. 

“IMenenja yeqembu ike yakhuluma naye uNdwandwe ukuthi avuselele inkontileka yakhe neqembu kodwa wala waphetha. Kunedlanzana labadlali aselitshelile ukuthi usehlale isikhathi eside eqenjini, usefuna ukuyogqoka ibheji elisha” kusho umthombo.

UNdwandwe waseMpangeni ungomunye wabadlali asebephenduke insika kuleli qembu njengoba abuye abambe ibhande lokuhola iqembu.

Wafika kuyona iLamontville Golden Arrows ngesizini yangowezi-2016/17, nalapho wafike wadlala kuMultichoice Diski Challenge (MDC) esibizwa ngeDStv Diski Challenge (DDC).

Emaqenjini amfunayo kuvela i-Orlando Pirates neSekhukhune United.

“IPirates vele ike yavela emaqenjini amfunayo phambilini. Ngeke ngathuka uma egcina ejoyina uNkosinathi Sibisi okuyona iPirates adlale naye isikhathi ku-Arrows. Kubuhlungu ngoba uzohamba mahhala, njengoPule Mmodi. Bekumele bemudedele noma isekuqaleni kwesizini,” kubeka umthombo. 

Kule sizini uNdwandwe usedlale imidlalo eli-15 yeDStv Premiership. 

Kusasa i-Arrows izotholana phezulu neSekhukhune United koweligi, lo mdlalo uzokuba seMpumalanga Stadium ngele-19:30. 

I-Arrows izodlala umdlalo wesi-9 ingakaze inqobe, ngeledlule iwashiswe yiTS Galaxy ijezi koweNedbank Cup.