IBanyana ifuna ukungagudluki esicongweni e-Afrika
IBanyana Banyana isizithwese ijoka lokuqhubeka nokuba yiqembu lesizwe elihamba phambili kwabesifazane e-Afrika.
Njengamanje iBanyana ikleliswe endaweni yokuqala e-Afrika. Ngaphezu kwalokho iyona engompetha be-Africa Cup of Nations (Afcon) kwabesifazane.
Ngonyaka odlule ifinyelele kuLast 16 yeNdebe YoMhlaba kwelaseNew Zealand. Kusasa ngelesi-3 ntambama izobhekana neTanzania emlenzeni wokuqala womdlalo wokuhlungela ukuzibekisela indawo kuma-Olympic Games azobanjelwa eParis kwelaseFrance ngonyaka ozayo. Umdlalo useDar es Salaam kwelaseTanzania.
Umgadli weBanyana uJermaine Seoposenwe usephumele obala ngesifiso sakhe sokubona elakuleli libambelela endaweni yokuqala e-Afrika.
“Ukuze siqhubeke sihlale eqhulwini e-Afrika ebholeni labesifazane kuyimpoqo ukuthi siqhubeke nokuzibekisela indawo emiqhudelwaneni emikhulukazi. Kubalulekile ukubuyela kuma-Olympic Games. Sesiside isikhathi singadlali kulo mqhudelwano. Iningi alikaze libe yingxenye yalo mqhudelwano. Abadlali abasha nabo kumele bawuzwe umuzwa wokudlala emiqhudelwaneni emikhulu njengama-Olympic Games. Sizimisele ngokuqhubeka nokudlondlobala njengeqembu. Kithina okubaluleke kunakho konke wukuhlala eqhulwini e-Afrika,” kusho uSeoposenwe.
“Wonke amazwe afuna ukusishaya ngenxa yokuthi yithina ompetha be-Africa Cup of Nations kwabesifazane. Sikleliswe endaweni yokuqala e-Afrika. Konke lokhu kusho ukuthi noma ubani odlala nathi ufuna ukuziveza. Injalo-ke ingcindezi yokwenza kahle. Engikwaziyo wukuthi iqembu lizimisele ngokunqoba nokubuya nomphumela omuhle ekuhambeni. Umdlalo siwulangazelele. Silindele ukuthi iTanzania isihlasele ngamandla njengoba idlalela ekhaya. Umdlalo ngeke ubelula. Sidlalela ezimeni ezinzima.” kulandisa uuSeoposenwe
Lo mgadli udlalile kuma-Olympic Games neBanyana ngowezi-2016 eRio de Janeiro kwelaseBrazil.
“Kuyajabulisa ukubuyela ekhempini yeqembu lesizwe. Lona ngumdlalo wokuqala unyakeni. Siqhubeka nomkhankaso wethu wokuzama ukuzibekisela indawo kuma-Olympic Games. Kunabadlali abasha eqenjini futhi kuyajabulisa ukubabona. Sonke siyawuqonda umshikashika esibhekene nawo njengeqembu,” kuchaza uSeoposenwe.
