EzikaMane zihlulekile ukungena emabhukwini omlando



UMaphumulo uyintatheli yezemidlalo.
ISenegal ihlulekile ukuzifaka emabhukwini omlando ohlwini lamazwe akhethekile emlandweniwe-Africa Cup of Nation (Afcon), njengoba iwashiswe ijezi i-Ivory Coast emdlalweni we-Last 16.
ILions of Teranga (iSenegal) iyona ebivikela isicoco se-Afcon. Umlando ehlulekile ukuzifaka kuwona owokuthi ithathe lesicoco kulandelana, amazwe aseke enza lokho i-Egypt, iGhana neCameroon.
I-Egypt nayo esiphumile kulo mqhudelwano isikwenze lokho amahlandla amathathu. Yakwenza okokuqala ngowe-1959, yaba yizwe lokuqala ukunqoba lomqhudelwano ngesikhathi uqala ngowe-1957.
Ikuphindile lokho iwunqoba ngowezi-2006, 2008 nango-2010. IGhana yona yaba ngompetha amahlandla elandelana ngowezi-1963 nangowezi-1965. ICameroon yona yawunqoba ngowezi-2000 nangowezi-2002.
ILions of Teranga ibibhekwe ukuthi iqhubeke nomgqigqo wayo omuhle njengoba kuyilona kuphela izwe eliyinqobe yonke imidlalo yamaqoqo.
Nokho itholane nezimbila zithutha ezingosokhaya (Ivory Coast), zayithela phansi othulini sekukhahlelwa amaphenathi.
Lo mdlalo obuseCharles Konan Banny Stadium, eYamoussoukro, uphele zibambene ngegoli elilodwa.
ILions of Teranga iyona ebone kuqala inethi kusaphele imizuzu emihlanu umdlalo uqalile, nelize noHabibi Diallo.
Kuthe sekubonakala ukuthi osokhaya bayaliwasha ijezi ngomzuzu wama-86 unozinti weLions of Teranga u-Edouard Mendy wawisa uNicolas Pepe ebhokisini kwaba iphenathi.
UFranck Kessie uthathe ibhola wathi abantu base-Ivory Coast abathembe yena, nebala wayivalela phakathi iphenathi.
Kube sekudlulelwa kuma extra-time, kwaze kwayiwa kumaphenathi ingekho efuna ukugoba uphondo.
UMoussa Niakhate uyena oshwebe iphenathi yeSenegal eshaye ipali, uKessie uvale umcimbi evalela phakathi eyokunqobisa osokhaya.
ISenegal bekumele kukhulunywe ukuthi umdlalo iwuqede ingasaphelele, uSadio Mane udlale kabi wathola ikhadi eliphuzi esikhundleni kwelibomvu.