UMdunge unguNdunankulu wokuqala ngale koThukela
ISILO kulempelasonto siqede ukukhuluma nokudidikela okudala obekuthi uBukhosi bakwaZulu bungaphesheya koThukela. Lokhu kukhuluma bekuyizikhalo zikaZulu ongasogwini naphakathi nezwe nozibona kokunye ubandlululekile noma unganakekile. Lesi simo uBhejane uke wazama ukusilungisa ngesikhathi eqala uhambo olubizwa nge-Royal Tour lapho ahambela khona izindawo ezifana naseNhlangwini nezinye ezizungeze uGu.
Okunye esakwenza ISILO esidala ukuqinisekisa ukuthi amabutho angaphandle kwakwaNongoma nasezifundeni iZululand neKing Cetshwayo adidiyelwa namanye avela kwenzinye izingxenye zesifundazwe, nokuwumsebenzi esawunika uMdidiyeli uZihogo. Sebuze ke ISILO sekuqala lokhu. Kule mpelasonto ISILO esisesihlalweni sikuqinisekisile lokhu ngesikhathi siqoka Inkosi uPhathisizwe Donatus Hastings Chiliza waseMadungeni. Kwabaningi lesi senzo seSILO senze umqondo ngenxa yamava uChiliza anawo ngoBukhosi neNdlunkulu. Usebenze kakhulu noMdlokombana noMntwana wakwaPhindangene. Futhi uyatuswa ngokulekelela uMdlokombane ekwenzeni uBukhosi bube ngaphandle kwepolitiki yamaqembu.
Inkosi uChiliza uzalwa nguMabusane Juniper Chiliza kusithole sakwaMsimanga. Ungumsinsi eMadungeni njengoba inkaba yakhe isesigodini sase Ncalu. Waqala amabanga emfundo aphansi khona eMadungeni, eMbambalala Primary School.
Wadlulela eZembeni eMkhomazi wafunda eDalusizo Secondary School wadlulela eHluzinqondo High School eMahlongwa. Ube esenza iDiploma kwi Office Administration eSuperia College eThekwini. Wadlulela e-University of KwaZulu-Natal wenza izifundo ze-Leadership and Good Governance. Usebenze kwaToyota SA kusathiwa kuseMotor Assembles.
Imisebenzi yoBukhosi neSihlalo
INkosi uPhathisizwe Chiliza waqokwa njengenkosi yesizwe saMadunge ngonyaka we- 1997 kuze kube yimanje. Wakhethwa njengoSihlalo weNdlu yaMakhosi KwaZulu-Natal kusuka ngowezi-2012 kwaze kwaba ngowezi-2022. Uqokwa kwesobuNdunankulu nje uyingxenye yethimba laMakhosi akwaZulu-Natal ahlala ohlakeni lweNdlu kuzwelonke kanti futhi unguSihlalo wendlu kwisifunda iHarry Gwala.
