UThimba uvule unyaka ngegiya eliphezulu enqoba i-Altron Big Easy



UNyuswa ungungoti kwezokuxhumana kukahulumeni nombhali. Ubengumfundisi wezokuxhumana nobuntatheli kwangqondonkulu.
Umdlali wegalofu elikhokhelwayo uToto Thimba Jnr uqede isomiso seminyaka emihlanu ngokudla umhlanganiso emncintiswaneni we-Altron Big Easy Tournament obubanjelwe eDainfern Golf and Country Estate eGauteng.
Lomdlali wagcina ukuphumelela ngesikhathi ethatha indebe ye-KCB Karen Masters eKenya. uThimba ozinze eSilver Lakes Country Club uzihole phambli zisuka amadaka kwaze kwaba semzuliswaneni wokugcina. Umzuliswano wokuqala uwudlale ngo 61 kanti owesibili uwuqede ngo 66. UThimba ongoweMamelodi ngokuzalwa, akagcinanga ngalemincintiswano emibili ukuphumelela. Ngowezi-2007 wadla iVusi Ngobeni Development Strokeplay, ngowezi-2012 nangowezi-2013, wadla iSunshine Big Easy Tour.
IBig Easy Tour yiqoqo lemincintswano elidlalelwa e-Afrika eseningizimu Leliqoqo lemidalo laqalwa ngowezi-2011 ngenhloso yokuthuthukisa abadlali begalofu ukuze bakhuphukele esigabeni eikhulu okuyi Sunshine Tour. Unyaka nonyaka labo abakleliswa babe abahlanu phezulu bathola ikhadi lokudlala kwi Sunshine Tour. Kanti labo abakleliswa kusukela esithupheni kuya kumashumi amathathu bathola ikhadi lokudlala emzuliswaneni wokugcina kwi Sunshine Tour Qualifying School. iQualifying School umncintiswano lapho abazethembayo bedlalela ukuthola ikhadi lokungena kwi Sunshine Tour.
IBig Easy Tour iqanjwe ngengqwele legalofu yaseNingizimu Afrika u-Eernie Els. Leligama le Big Easy lisukela ekutheni lomdlali udume ngokuthi ushwiba sakuncenga uma eshaya igalofu kepha umphumela uba mkhulu.
Kusukela ngowe-2018, lomncintiswano usunamaphuzu e-Offiial Golf Ranking okuwukukleliswa kwabadlali emhlabeni jikelele. Odle umhlanganiso emizuliswaneni emithathu uthola amaphuzu amathathu kanti owudle kwimizuliswano emine uthola amaphuzu amhlanu.