Phezu kwezinkulumo ubuso bobuholi busefana, ngamadoda!
INingizimu Afrika ngelinye lamazwe asekhaleni lomkhankaso wokulungisa iziphambeko zayizolo manxa kufika kubulili. Ucwaningo lweG20 olwabe lubheka abasifazane ezikhundleni eziphezulu kuhulumeni zathola elakuleli limi kahle njengoba laba ngelesithathu lilandela iCanada (51.1%) i-Australia (48.6%) kanti iNingizimu Afrika (48.6%) ikeliswe yaba ngeyesithathu.
Lapha elakuleli ledlula amazwe amakhulu afana ne-United Kingdom (46.7%) iBrazil (41.9%), iMexico (38.3%) ngisho ne-European Commission (38.3%), i-United States yona ikeliswe le emuva (37.9%).
Ngisho kufika ebuholini babesifazane ezinhlakeni zephalamende nakuhulumeni elakuleli libalwa namazwe ahamba phambili. Nokho lobu buhle bugcina lapho njengoba kuwo onke amaqembu asephalamende nalawo ezobe engenele ukhetho kulonyaka abekho abesifazane. Ephalamende emuva kokwedlula emhlabeni komholi we-National Freedom Party (NFP) okaMagwaza Msibi kwabe sekusala uNks u de Lille ongumoli we-Good.
Njengoba izwe liya okhethweni nje nakulokhu abaholi besifazane kabekho uma bekhona bazobonakala ohlwini lwamaqembu. Kuwo onke amaqembu amakhulu kwaphikisayo nalelo elibusayo ubuso bobuholi nemikhankaso ngobamadoda.
Kukhona uRamaphosa (ANC), uSteenhuisen (DA), uMalema (EFF), uHlabisa (IFP) uHolomisa, UDM) uZungula (ATM ) uNyhontso (PAC), uLekota ( Cope),uGalo (AIC) uGroenewald ( VF+), kanye noMeshoe (ACDP).
Ngisho amaqembu amasha awakuguqulanga lokhu ngoba nawo aholwa ngamadoda. Okusho ukuthi uma ekwazi ukungena ephalamende kuzofana.
