Bazoyifutha kuzwakale indweba e-ivory Coast uTom no-Makalina

UMaphumulo uyintatheli yezemidlalo.

Ngaphandle kweBafana Bafana ezomela iNingizimu Afrika ku-Africa Cup of Nations (Afcon), elakuleli lizophinde limelwe onompempe ababili.

U-Abongile Tom no-Akhona Zennith Makalima, bayingxenye yonompempe abangama-68 abazodlalisa lo mqhudelwano ozobanjelwa e-Ivory Coast.

I-Afcon izoqala kusasa ngoMgqibelo ize isongwe mhla zili-11 kuNhlolanja.

UTom oneminyaka yobudala engama-32 kulindeleke ukuthi ephephezelise ifulegi lakuleli njengoba yena ezothola ithuba lokudlalisa kweminye imidlalo.

Amava anawo iwona azodingakala, kwazise kuhlezi kunzima ukudlalisa ngaphandle.

UTom oqale ukudlalisa esigabeni esikhokhelayo ngowezi-2018, uke wadlalisa imidlalo emikhulu okubalwa eye-African Football League (AFL), Caf Champions League, Caf Confederation Cup, Eyokuhlungela iNdebe YoMhlaba, nyakenye udlalise iNdebe YoMhlaba yabaneminyaka engaphansi kwengama-20 e-Argentina.

Ngesizini yangowezi-2018/19 wahlomula ngomkIomelo weReferee of the Year, ngaphansi kwePremier Soccer League (PSL).

Phambilini u-Abdul Ebraham oyinhloko yonompempe kuleli wakuveza ukuthi ubona uTom ezolandela uVictor Gomes wodumo ngokukhipha amakhadi abomvu.

Nguqhude manikiniki phakathi kweLos Blancos neCitizens namuhlanje

U-Akhona oneminyaka engama-35 usedlalise kuzona zonke izigaba lapho kubalwa iSAB League, i-ABC Motsepe League, iMotsepe Foundation Championship nakuDStv Premiership.

Ngaphandle udlalise i-African Women’s Cup of Nations (AWCON), eyayibanjelwe eMorocco ngowezi-2022. Uphinde wadlalisa iNdebe YoMhlaba yabesifazane ebise-Austrealia ngokubambisana neNew Zealand nyakenye.

Isifiso sakhe ukuthi ngelinye ilanga adlalise iSoweto Derby lapho kusuke kudlala i-Orlando Pirates neKaizer Chiefs.