ASIBESABI: UJohnson uwufanisa nowamanqamu oweChiefs neSundowns

Uwufanisa nowamanqamu umdlalo wezakhe neMamelodi Sundowns umqeqeshi weKaizer Chiefs uCavin Johnson.

Kusasa ngelesi-7.30 ebusuku, Amakhosi azobhekana neBrazilians emdlalweni weDSTV Premiership. Umdlalo uzodlalelwa eFNB Stadium, eNasrec, eGoli.

ISundowns izophakamisa isicoco seligi uma iqoqa amaphuzu amathathu osukwini lwakusasa.

“Indaba yeSundowns yokunqoba isicoco seligi akuyona into esiyifake ekhanda. Ngakho angikwazi ukuphawula ngayo kakhulu. Akuyona into esizixaka ngayo. Njengamanje sizixaka ngeKaizer Chiefs nokuthi ingenza kanjani ukuze iqede ngenothi eliphezulu,” kubeka uJohnson.

IChiefs izabalazela ukuqeda ibalwa namaqembu ayisishiyagalombili ku-log.

“Ngumdlalo omkhulu kithina lo. Sidlalela ekhaya eFNB Stadium kanti nokuzethemba kusaphezulu kulandela ukushaya iSuperSport. Amalungiselelo omdlalo ahamba kahle kakhulu. Inhloso yethu wukuvala isizini ngenothi eliphezulu. Yonke imidlalo esele ifana neyamanqamu kithina. Ngakho ngoLwesine (kusasa) sibhekene nomunye umdlalo wamanqamu,” kuqhuba uJohnson.

IChiefs izodlala ngaphandle kwezithenjwa zayo zabadlali abasalimele.

“U-Itumeleng Khune usalimele. UKeagan Dolly naye akakalulami. Babuye bebanjwe umkhuhlane omubi. UPotsane omunye ongakabi ngumqemane. UMshini (Nkosingiphile Ngcobo) useyaziqeqesha neqembu,” kulandisa uJohnson.

Izimpofana zizoqeda unyaka wesishiyagalombili zishwiba izandla.

“Siyazi ukuthi asiyitholi imiphumela ngale ndlela esifisa ngayo. Okuhle wukuthi siwaphendulile amatafula ngoMgqibelo. Abalandeli abaphume ngobuningi ukuzosiseka. Sibhekene neqembu eliqinile. ISundowns asiyisisabi. Siyakhohlwa wukuthi singabhekana nayo,” kuphetha uJohnson.