Ubhoboka ngesifiso sokudla ubhedu oweSundowns Ladies
Igaqele izicoco ezintathu ngesizini eyodwa iMamelodi Sundowns Ladies esanda kudla ubhedu kuCaf Women’s Champions League. ISundowns Ladies iqumbe phansi iRaja Casablanca ngo 3-0 kowamanqamu obuse-Amadou Gon Coulibaly Stadium, e-Ivory Coast ngempelasonto eyedlule. Amagoli eSundowns abaselwe enethini nguRefilwe Tholakale obhakuzise enethini amabili noBiotumelo Rabale. Ngemuva kwalokho iSundowns yekhale yemuka nesamba sika-R8 million ngokuba ngompetha bomqhudelwano.
Umqeqeshi weSundowns uJerry Tshabalala usevule isifuba ngesifiso sakhe sokuwola izicoco ezintathu kule sizini ka-2023.
“Amathuba okunqoba isicoco seligi asekhona. Ngicabanga ukuthi sisethubeni elihle kakhulu lokunqoba isicoco seHollywodbets Super League. Sike sakwenza phambilini. Sanqoba izicoco ezintathu ngo-2023. Nakulo nyaka sinalo ithuba lokunqoba izicoco ezintathu,” kuchaza uTshabalala. Ngemuva kwemidlalo engamashumi amabili yesishiyagalombili leli qembu seliqoqe amaphuzu angu-66 emidlalweni engu-25.
Isele ngamaphuzu ayisithupha ku-University of Western Cape ehlezi esicongweni ngamaphuzu angu-72 ngemuva kwemidlalo engu-28. ABanyana Ba Style basele emuva ngemidlalo emithathu ngenxa yokuthi bebeyingxenye yeChampions League. Kule sizini, iSundowns, ivele isidle umhlanganiso kuCosafa Women’s Champions League.
“Kuyiqiniso ukuthi sisalele emuva ngemidlalo. Imidlalo esele akuwona amaphuzu aseqoqiwe. Kusamele singene enkundleni silwela amaphuzu namaqembu esizobe sibhekene nawo. Ngikhulumile nosisi ngabatshela ukuthi iChampions League sesiqedile ngayo futhi isifana nomlando kithina,” kuqhuba uTshabalala.
NgeSonto ngo-3 ntambama iSundowns izodudulana neThunderbird.
“Imiqondo yethu ayisekho kuChampions League. Njengamanje sesigxile emidlalweni yeHollywoodbets Super League futhi asifuni okuzosiphazamisa. Sesiqalile ukwenza amalungiselelo emidlalo elandelayo yeligi. Sizimisele ngokunqoba yonke into kule sizini.” kulandisa uTshabalala. ISundowns iyazenzela ebholeni laseNingizimu Afrika. Isanda kuphakamisa inkomishi ye-African Super League (AFL) ithela othulini iWydad Casablanca kowamanqamu.
Ihlomule ngesamba sika-R74 million ngokunqoba lesi sicoco. Abafana Ba Style basanda kuqunjwa phansi yi-Orlando Pirates kowamanqamu weMTN8 sekukhahlelwa amaphenathi eMoses Mabhida Staduum, eThekwini. Kuyimanje iSundowns ivule igebe esicongweni seDSTV Premiership.
“KuSundowns ukunqoba yinto ewusiko lweqembu. Ukweqiwa yizicoco yinto engamukelekile okwangempela. Asikho isikhathi salokho kuzona zonke izinhlaka zeqembu. Lowo owayengumengameli weSundowns, uPatrice Motsepe (osengumengameli weCaf) wakubeka kwacaca ngesikhathi ethenga iqembu ukuthi uzimisele ngokukhonya e-Afrika. Njengamanje iSundowns isemgqeni yokwenza lokho. Sizoqhubeka nokwenza lokho ukufeza isifiso sakhe seminyaka. Ngaso sonke isikhathi iyona into esifaka ugqozi.” kuphetha uTshabalala
 | ReplyForward |