Zithe chithi saka ezemidlalo eThekwini
Abalandeli bezemidlalo esifundazweni saKwaZulu-Natal (KZN) bafana nekati elibekelwe ubisi noshizi ngenxa yokuba chithi saka kwezemidlalo ezahlukene.
Intatheli yelaboHlanga uZipho Singela isibhekela izinkundla nezindawo ongazivakashela kule mpelasonto uma ungumlandeli wezeMidlalo uzinze eKZN.
Richards Bay FC v Orlando Pirates:
Kusasa ngele-3.30 ntambama, eZimnyama zizotholana phezulu neNatal Rich Boys emdlalweni weDSTv Premier ozoba seKing Zwelithini Stadium esesigcemeni sakwaD, eMlazi.
Amathikithi alo mdlalo asatholakala ezitolo zakwaShoprite nakwaCheckers. IPirates isazikhotha amanxeba ngemuva kokuthelwa othulini yiRichards Bay FC kuCarling Knockout Challenge eMoses Mabhida Stadium emavikini adlule. IBay ivika izembe. Iyibambe endaweni yesibili uma usuka ekugcineni. EZimnyama zisanda kuqumba phansi abakhaya bayo, iKaizer Chiefs emdlalweni wabakhaya baseSoweto.
AmaZulu v Stellenbosch:
Usuthu luzogadulisana neStellies eMoses Mabhida Stadium, eThekwini emdlalweni weDSTv Premiership kusasa ngele-3.30 ntambama. Amathikithi alo mdlalo aseyadayiswa eTicketpro. Abiza ama-R40 kwabadala. AmaZulu akayazi induku emidlalweni emihlanu eyedlule kuyo yonke imiqhudelwano.
Hollywoodbets Sharks v Dragons:
Ngele-7 ebusuku, iSharks izodudulana neDragons eHollywoodbets Kings Park Stadium emdlalweni we-United Rugby Championship. Leli qembu alikaze linqobe selokhu kuqala isizini. Selidliwe imidlalo emihlanu ilandelana. Lishaywe imidlalo emine ekuhambeni kwathi ngeledlule laguqiswa yiConnacht ngo 13-12 ekhaya. Kusasa oShaka bazobe bebheke ukubuyisa izinduku.
Isibhakela:
Kusasa ngehora lesine eGlobe, eSuncoast Casino, eThekwini kunesibhakela esiqhuza umentshisi. Kunezimpi ezihlelwe nguZandile Malinga weStarline Boxing Promotion ebambisene noMnyango wezeMidlalo, ezokuNgcebeleka namaSiko. Le ndumezulo yesibhakela izokwakhiwa yizimpi eziyisishiyagalombili. Impi ebhekwe ngamehlo abomvu ngeyebhande SA Junior Welter Weight phakathi kukaPrince Dlomo noNtethelelo Nkosi. UDlomo uzobe evikela ibhande lakhe ihlandla lesihlanu.
Enye impi enkulu ngeyeSA Junior Bantam Weight kwabesifazane lapho uThema Zuma ongumpetha ezobe engqimuzana khona noBabalwa Ngqongqotha
KZN Netball Awards:
Ngele-6 ntambama kunemiklomelo yebhola lomnqakiswano KwaZulu-Natal (KZN). Le miklomelo izobanjelwa eGarden Court, eMarine Parade, eThekwini. Intatheli yelaboHlanga, uSabelo Maphumulo uqokiwe kule miklomelo.
