UDelisile utusa ukunganengwa nokubekezela ku“Sticks”
Lowo owayengunozinti weBanyana Banyana uDelisile Mbatha uncoma u-Andile “Sticks” Dlamini ngokuthi akalibhekisi ikhanda phansi yize kade ephuma esikhathini esinzima.
U-Andile ongunozinti weBanyana Banyana neMamelodi Sundowns Ladies, ubebhekiwe ukuthi asize iqembu lesizwe koweNdebe YoMhlaba ebibanjelwe e-Australia ngokubambisana neNew Zealand. Kodwa lonozinti wagcina elizwa ngendaba ijezi ngoba kuyona yonke imidlalo kwavimba uKaylin Swart okwaba kuningi ukukhuluma okungekuhle ngaye.
Kwashiya imibuzo ukungavimbi kwakhe u-Andile kwazise uyena owalekela iBanyana Banyana ukuthi inqobe iWomen’s Africa Cup of Nations (Wafcon) eyabe iseMorocco nyakenye, wagcine eqokwa njengonozinti ovelele.
Ngeledlule lo nozinti uqokwe njengonozinti ovelele emva kokuthi iSundowns Ladies inqobe iCaf, okungumqhudelwano wokungena koweCaf Women’s Champions League ezodlalelwa e-Ivory Coast ngoLwezi nonyaka.
“Okwenziwe u-Andile kutshengise okukhulu ukukhula ngoba ukube omunye umuntu ubengeke abe nomqhudelwano, emva kwento eyamehlakalela ngesikhathi seNdebe YoMhlaba. Empilweni kubalulekile kwesinye isikhathi noma isimo singesihle, kodwa uqhubeke nokusebenza kanzima. Ngiyambongela kakhulu ukuthi ube nomqhudelwano omuhle, isipiliyoni sakhe sisebenzile” kusho uDelisile.
UDelisile wadlala eqenjini lesizwe nabadlali abazakhela igama lapho kubalwa uPortia Modise, uVeronica “Bhundu” Phewa, Makhosi Luthuli, Desiree Ellis (oseqeqesha iBanyna Banyana) no-Anna Monate ukukha phezulu.
NgoLwesibili kusihlwa u-Andile lapho kade kukonyeliswa abenze kahle koweMomentum gsport, ugoduke nomkomelo omukhulu we “Athlete of the Year”. Kulo munxa ubeqokwe noLaura Wolvaardt ongumdlali wekhilikithi kanye noLara van Nierkerk ongumbhukudi.
“Lokhu kuphumelela kwakhe kuchaza ukuthi impela uyasebenza kakhulu u-Andile. Ngokunqoba lo mkomelo ngiyambongela kakhulu, kusho ukukhuphula umdlalo kanobhutshuzwayo wabesifazane ongakutholi ukuhlonishwa okwanele” kubeka uDelisile.
Eqhuba uthe: “Iminyaka ka-Andile yize isihambile kodwa ngiyamfisela ukuthi engathola ithuba lokuyodlala phesheya kwezilwandle. Kuningi angakufunda khona okungalekela iBanyana Banyana uma ibhekene namaqembu aqhamuka phesheya. Ngiyakholelwa kuyena, usebenza kakhulu” kubeka uDelisile.
Kumcimbi weMomentum gsport okade kowe-18, u-Andile uphinde wavela ngesikhathi eyomukela umkomelo weTeam of the Year okube iBanyana Banyana. Nomqeqeshi uDesiree uwutholile umkomelo womqeqeshi ovelele. Nabaxhasi abakhulu beBanyana Banyana iSasol ithole umkomelo weSponsor of the Year.
Ngeligi iHollywoodbets Super League isiya ngasekupheleni kwesizini, umbango ushube kakhulu.
I-University Western Cape (UWC) iyona ezihola phezulu ngamaphuzu angama-57 emva kwemidlalo engama-21. ISundowns Ladies ejwayele ukuzihola phambili ilele endaweni yesibili ngamaphuzu angama-50 emdlaweni eli-19.
“Kuyajabulisa ukuthi i-UWC iyona ezihola phezulu iqede ukuchanasa kweSundowns Ladies, lokho kwenza iligi ibemnandi kakhulu. Ukuba khona amaqembu anjenge-TS Galaxy neRoyal AM kuzoyikhulisa kakhulu iligi yethu. Siyabonga kwabakaHollywoodbets ukuvusa uthando likanobhutshuzwayo wabesifazane” kusonga uDelisile.
