Kuzoqhwiza umentshisi imbokodo izwana amandla eThekwini

UMaphumulo uyintatheli yezemidlalo.

Selufikile olungaliyo e-Olive Convention Centre (OCC), eThekwini kusasa ngoMgqibelo lapho imbokodo izozwana amandla kuchungechunge lwezimpi. Lezi zimpi zihlelwe ngokuhlanganyela iHle Jobe Boxing Promotions kaHlengiwe Sithole, iMvelo Boxing Promotions kaNomvelo Magcaba-Shezi, iStarline Boxing Promotions kaZandile Malinga neSugarboy Boxing Promotions kaNomfundo Malinga.

Kuzoba ngokokuqala ukuthi kube nezimpi zabantu besifazane kuphela. Kanti nobuhlakani balaba ophromotha abane, kuzodlala indima ekuthenini abathandi besibhakela bazozibonela izimpi zeqophelo.

Lolu chungechunge lezimpi ngokusho kweBoxing South Africa (BSA) eholwa uNsikayezwe Sithole, njengoba luqala esifundazweni iKwaZulu-Natal kusasa luyoze luphele ngoNdasa ngonyaka ozayo.

Empini yosuku, uMapule “Thunder” Ngubane waKwaZulu- Natal uzovikela ibhande likazwelonke leMiddleweight kuRushda Mallick wase-Eastern Cape. Lempi kuzoba impinda amshaye, bebhekene okokuqala uMapule wanqoba ngamaphuzu.

**Nomvelo Magcaba-Shezi weMvelo Boxing Promotions noHlengiwe Sithole weHle-Jobe Boxing Promotions**

Enye impi ebhekiwe ephakathi kaThema Zuma ozobe evikela ibhande likazwelonke le Bantamweight kuChinenwe Banda waseZimbabwe.

UThema oqeqeshwa nguSizwe Mthembu eLudonga Boxing
Gym, utshele elaboHlanga ukuthi uChinenwe uzomnika izibhakela ezimbalwa bese emlalisa phansi kungakafiki kumzuliswano wesi-8 ekalelwe wona.

ElaboHlanga likhulume nophromotha ngamunye ngamunye ukuthi kusho ukuthini, ukuhlanganiswa kwabo kulezi zimpi. Lokhu ngabe kuzosiyelisaphi isibhakela saKwaZulu-Natal, kakhulukazi kwabesifazane.

Nomvelo Magcaba-Shezi:

“Kuyisiqalo lesi. Uma zingaphumelela lezi zimpi,

kungakuningi esingakwenza ukuqhubekela phambili. Into ebalulekile ukubambisana, singasebenzi ngayedwana. Sikwenze konke okusemandleni ukwenza lezi zimpi zibe seqophelweni eliphezulu” kusho uMagcaba-Shezi osanda kunqoba umkomelo we-Aspiring Promoter of the Year kumaBSA Awards.

Uphinde wabalula ukuthi njengoba lolu chungechunge lezimpi zabesifazane luqala kulesi sifundazwe, ingcindezi inkulu ngoba kumele benze isiqiniseko sokuthi konke kuhamba kahle.

Zandile Malinga:

“Kusho lukhulu, lengqayizivele isinika ithuba lokuthi singophromotha besifazane saziwe. Yize eminyakeni edlule belungabibikho ushintsho, kodwa muva nje kuyakhombisa

ukuthi kukhona lapho siya khona. Siyabonga kwabezindaba ngokuthi bangene nakulo mdlalo, kwazise ibona ekade sasibafisa ngoba ngisho senza kahle bekungabonakali. Siyathembisa sizoqhubeka sibambisane, singophromotha besifazane”.

Hlengiwe Sithole:

“Kujwayeleke ukuba kuthiwe abantu besifazane abazwani, kodwa thina sifuna ukukuqeda lokho. Lobudlelwano esesibuqalile sifuna buqhubekele phambili kunyuse isibhakela sabesifazane KwaZulu-Natal. Ngiyajabula kakhulu ukuba yingxenye yale ngqophamlando”.

Nomfundo Malinga:

‘Sengikucijele ukumela izwe kumaCommonwealth Games

“Ngimusha ekubeni nguphromotha ukuhlangana nabantu abaphambili kunami kungithokozise kakhulu.

Ngifundile, ngisafuna ukufunda okukhulu. Ngiyojabula uma kungathiwa ukuhlangana kanjena akugcini ngalezi zimpi. Ngiyafisa abantu beze bezogcwalisa

i-OCC. Nakanjani izimpi zizoba seqophelweni eliphezulu”.

Ezinye izimpi:

Bathabile Ziqubu (KZN) vs Sehliselwe Nhliziyo (KZN), Bantamweight 6 Rounds.

Nothabo Ncube (KZN) vs Nontobeko Thusi (KZN), Junior Bantamweight 4 rounds.

Nomfundo Xaba (KZN) vs Precious Msibi (KZN), Junior Bantamweight 4 rounds.

Nobengazi Booth (KZN) vs Noxolo Mkhasibe (KZN), Middleweight 4 rounds.