Kubonakala luselude ukhalo kwelikaMeyiwa
Emndenini nakubalandeli bowayengunozinti weBafana Bafa ne-Orlando Pirates umufi uSenzo Meyiwa, sekucacile ukuthi iseyinde indlela ebheka ekutholeni iqiniso ngokubulawa kwakhe.
Ngaphezu kokuhamba ngonyawo lonwabu kokuqulwa kwecala ngenxa yokubamba kuyeka kombuso, okunye okubuye kwanezela ngaphezulu kube isinqumo sayizolo sikaMengameli uCyril Ramaphosa sokumisa abehluleli. Kubona kukhona nohlalele leli cala elingundabamlonyeni eNkantolo eNkulu yaseGauteng uTshifhiwa Maumela. Umiswe kanye noMehluleli uNomonde Mngqibisa-Thusi. Laba behluleli bamiswe ngenkathi iJudicial Conduct Tribunal icubungula izikhalazo zokuthi bahlulekile ukwethula izinqumo eziningi ebebezigodlile ngesikhathi esibekiwe.
UMengameli uthatha lesi sinqumo nje bese zivele zinkulu izikhalo ngoMaumela.
Kokunye izinqumo abezithatha ecaleni likaMeyiwa bezibambezela kokunye icala lingaqhubeki ngoba ebika ukugula.
IJudicial Service Commission (JSC) ikuqinisekisile ukuthi uMengameli uwamise emsebenzini amajaji amabili kulandela isiphakamiso sekhomishini.
“IJSC inqume ukuthi ukwehluleka ukwethula izahlulelo ezigodliwe, uma zisungulwa, kuzokhombisa ukungakwazi ukusebenza, ukungakwazi ukwenza kahle okukhulu noma ukungaziphathi kahle kwamajaji, kucatshangelwa izinga lokubambezeleka kanye nokucwasa okutholwe abathintekayo,” kusho isitatimende se-JSC.
Ngesikhathi sokufaka isikhalazo, uMaumela ubengakazikhiphi izinqumo emacaleni amathathu, asukela mhla ziyisi-8 kuNcwaba wezi-2018, zingama-16 kuNcwaba wezi-2018 nangomhla ziyi-17 kuMandulo wezi-2018.
Ezethulweni zakhe azibhalele i-JCC, uMaumela uthe usezikhiphile izinqumo ezintathu.
Kwakukhona ezinye izindaba eziyisishiyagalolunye, kodwa kusukela ngaleso sikhathi kwakhishwa isinqumo kuzo zonke.