Ubona bebaningi abazohlomula ngeKhabba Cup uMkhize



UMaphumulo uyintatheli yezemidlalo.
Ukufika kwezinkakha kuzonyusa nezinga lokuzethemba kubadlali abancane
Umsunguli weKhabba Cup uManqoba Mkhize ukholelwa ukuthi baningi kulo nyaka abadlali abazothola amadlelo aluhlaza ngenxa yalo mqhudelwano.
Lo mqhudelwano ozodlala okwesibili nonyaka, nyakenye iqembu elidlala kuDStv Premiership iRichards Bay FC lahlabana ngomgadli omncane uYanela Mbhuthuma.
Lo mgadli oneminyaka yobudala engama-21 waba nomqhudelwano omuhle kwasuka umsindo njengoba agcine esebangwa iRichards Bay FC neLamontville Golden Arrows. Wagcina ephelela kwiBay eyamsayinisa iminyaka emithathu. Kusizini esongwe emasontweni edlule uMbuthuma udlale imidlalo engama-24, washaya igoli elilodwa iNatal Rich Boyz lapho yayibhekene neSekhukhune United eKing Zwelithini Stadium, eMlaza.
UMkhize ekhuluma nelaboHlanga uthe: “Nonyaka ngiyathemba ukuthi baningi abadlali abazothola ithuba lokuyogijima kuPremier Soccer League (PSL), lapho ngibala iDStv Premiership neMotsepe Foundation Championship. Okuhle ukuthi lo mqhudelwano wenzeka isizini ivaliwe wonke amaqembu evalile. Abaqeqeshi nezinhloli (Scouts) bazobe bekhona. Nanyakenye ngiyakholwa ukuthi babebaningi abadlali ababengathola ithuba lokuyodlala esigabeni esiphezulu inkinga kwakungalindelwe ukuthi iKhabba Cup yayingaba sezingeni eliphezulu ngaleya ndlela,” kusho uMkhize.
UMkhize ngezikhathi zakhe udlalile ebholeni elikhokhelayo, njengoba agijima ku-AmaZulu FC, iBlack Leopards, iKaizer Chiefs neSilver Stars kanti wake wadlala nasemazingeni aphansi eqenjini lesizwe.
Okugqamile ngalo mqhudelwano ukuthi amaqembu azoba yingxenye yawo agijima ku-ABC Motsepe League, kukhona iDurban Pioneer noMkhumbane Classic abadlala esifundazweni iKwaZulu-Natal kube iSinenkani FC (Evikela isicoco) yona edlala e-Eastern Cape.
“Ukuba khona kwamaqembu adlala esigabeni sesithathu lapha eNingizimu Afrika, kuveza ngokusobala ukuthi izinga likanobhutshuzwayo lizobe liphezulu kakhulu. Inhloso yami yokusungula kwabe kuwukuthi nginxenxe izinhlolikhono zamaqembu amakhulu ukuthi zize lapha zithole abadlali abadlala emazingeni aphansi,” kubeka uMkhize.
NgoLwesihlanu olwedlule eCoastland Hotel, eMusgrave aqhathiwe amaqembu angama-32 azobe ekhona kulo mqhudelwano. Kuhlukene amaqoqo amane, lapho kuzobe kudlalwa eGlebe Stadium, SJ Smith Stadium eyaziwa ngeWema nasezinkundleni zaseMlazi. NgeSonto imidlalo yonke izobe isiqedelwa eKing Zwelithini Stadium.
Amaqembu onke azohlomula ngejezi lakaJoma, kuthi iqembu elidle umhlanganiso ligoduke nezinkulungwane ezingama-R80 olele isibili agoduke nezinkulungwane ezingama-R40.
Kuzophinde kuhlomule umdlali ovelele ozohamba nezinkulungwane ezimbili, oshaye amagoli amaningi, unozinti ovelele, isitobha esivelele, umdlali wasesiswini ovelele bonke bazothola inkungwane umdlali ngamunye.
Abadlali abancane bazothola inqayizivele yethuba lokubona abadlali abadlale ebholeni elikhokhelayo eminyakeni edlule.
Ngokusho kukaMkhize uthe kubadlali abazovulela umdlalo wamanqamu lapho kuzobe kukhona izinkakha uMbulelo “OJ” Mabizela, uVusumuzi Vilakazi, uSteve Lekoelea, uPapi Zothwane, uTsepo Tsoane, uSiyabonga Sangweni, uNjabulo Manqana, uSithembiso Ngcobo noNeil Tovey nabanye abaningi. Kuzophinde kudlale izintatheli kanye neqembu loKhozi FM.
Esonga uMkhize uthe: “Nginxusa abalandeli bephume ngobuningi babo bezothamela imidlalo eseqopheleni eliphezulu. Ngibonga wonke amaqembu angenele umqhudelwano, ngibonge kakhulu laba abaxhasile ngakho konke.
IKhabba Cup ixhaswe uMnyango weZemidlalo esifundazweni iKwaZulu-Natal, iMenziwa Holdings, iJoma, uMasipala weTheku neMandos. Nesikhulu seRichards Bay FC uSifiso “Jomo” Biyela ufake izinkulungwane ezingama-R50 njengoba ahlomula ngomdlali.