Osomabhizinisi boHlanga basenethemba ngo-Eskom
IBlack Business Council (BBC) ithi inethemba lokuthi u-Eskom uzojika wenze kancono njengoba kancane kancane ukuthenjwa ngumphakathi kubuyiselwa ebhodini lenkampani ephehla ugesi. Lokhu kuza ngemuva kosuku olugcwele ngaphandle kokucinywa kukagesi ngoLwesibili.
U-Eskom uqale ukucisha ugesi esigabeni sesibili kusukela ngehora lesi-5 ekuseni ngoLwesithathu ekuseni. Isigaba sesithathu siqale ngehora le-4 ntambama ngawo uLwesithathu.
Ezinye ingcwethi kwezamandla zithi iNingizimu Afrika ayikaphumi ehlathini. Kodwa isikhulu esiphezulu somkhandlu weBBC uKganki Matabane uthe kubalulekile ukuthi sikujabulele ukuthuthuka okuncane komthamo wokukhiqiza. “Kumele sibungaze izinto ezincane ukuze sikhuthaze abasebenzi bakwa-Eskom ukuthi benze kangcono futhi benze okwengeziwe. Uma ungenabo ubuholi obuhle ekugcineni kosuku, ngeke uxazulule izinkinga. Abasebenzi abajabulile, abaphathi abajabulile, wonke umuntu akajabulile. Awukwazi ukuba nenhlangano esebenzayo uma ungenabo ubuholi obufanele. Ibhodi lenze kahle kakhulu. Sicabanga ukuthi sisendleleni efanele,” kusho uMatabane.
Khonamanjalo, inkampani ephehla ugesi ithi isikuqedile ukususwa kwejeneretha yesitimu engamathani angama-320 eKoeberg Power Station e-Unit One eKapa, njengoba u-Eskom esebenzela ukwelula isikhathi sokuphila kweKoeberg ngeminye iminyaka engama-20.
Okhulumela u-Eskom uDaphane Mokoena uthe, “Ithimba laseKoeberg manje selizoqhubeka nokukhipha amajeneretha amabili asele ukuze afake amasha amathathu. UMokoena uthe i-Unit One izohlala ingasebenzi ngesikhathi kuqedwa umsebenzi wokuyivuselela. Uthe i-Unit Two iqhubekile nokusebenza ngokuphepha futhi izoshintshwa yisteam generator ngasekupheleni kwalo nyaka.
