Ekugcineni ilethe injabulo yavusa neminjunju eyamaholo ezinduna
Ekugcineni isimemezelo esenziwe uhulumeni kuleli sonto sokukhokhelwa kwezinduna imiholo yeminyaka ebisilele silethe injabulo savusa usizi nomunyu kweminye yemindeni yezinduna esezalala zilindile. Ngokombiko wangaphambilini welaboHlanga, zingaphezulu kwekhulu izinduna zamakhosi esezibulewe esifundazweni kusuka ngonyaka we-2020.
Njengoba kweminye imindeni kujatshulwa ngokuthi ekugcineni, impi osekuphele iminyaka iliwa izinduna isinqotshiwe, kweminye kuvuka umunyu kwehla nezinyembezi, kukhunjulwa labo abalala bengazidlanga izithelo zemisebenzi yabo.
Ezinye zezinduna ezabulawa esifundazweni kukhona iNduna uMakhosonke Cele wase-Emambedwini ngaphansi kwesiFunda iLembe, induna uNtuli oSuthu, induna uDkt uNgcobo wobukhosi bakwaHlengwa kwaThoyana obulewe nonyaka. Zonke lezi zinduna zibulewe zisebenzela izizwe namakhosi azo, kepha sezizokuzwa ngendaba umhlomulo wezithukuthuku wokuzikhandla kwazo.
Ubumbano Lwezinduna esifundazweni lusamukele isimemezelo esenziwe uhulumeni ngomlomo kaMphathiswa Wezokuthuthukiswa Komnotho Nokuvakasha esifundazweni uMnu uSboniso Duma. Kufinyelelwa kulesi sinqumo nje, izinduna beziwa zivuka zifuna ukuba kufikwe esiphethweni salou daba.
Zaze zangqongqoza naseqenjini iDemocratic Alliance (DA) ziyinxusa ukuba ilekelele ngoba ithi uhulumeni usuhlulekile. Enkulumeni yakhe yokuvala umhlangano weqembu, uthe uKhongolose uyabuhlonipha ubuholi bomdabu njengoba kwaba yibo ababamba iqhaza elikhulu ngesikhathi isungulwa ngowe-1912.
Enza lesi simemezelo uDuma uveze ukuthi uMgcinimafa usebeke eceleni imali eyizigidi- ezingama-630 ukukhokhela imali ebisilele yezinduna okuzokwenzeka ngenyanga ezayo. Ubumbano Lwezinduna lubonge i-ANC ngokuma nayo ekulweni nokuba uhulumeni kazwelonke udedele le mali. UMnu uDlamini woBumbano Lwezinduna ucashunwe ethi, “Nakuba seziningi izinduna ezingasekho emhlabeni, kodwa sinethemba ukuthi imindeni yazo izothobeka amanxeba ngalesi simemezelo,”
USihlalo Wekomidi likaMgcinimafa uMnu uSipho Nkosi uthe uMnyango Wezokubusa Ngokubambisana nezindaba Zomdabu ngokubambisana nezinduna bebewa bevuka belwela ukuthi izinduna zikuthole okungokwazo. Le mpi iqale ngesikhathi kusekhona uMengameli uJacob Zuma njengoba ize inqotshwa emuva kweminyaka. Abaphathiswa abedlule boMnyango Wezokubusa Ngokubambisana Nezindaba Zomdabu esifundazweni bekukhalwa kubo ngalolu daba bathembise ukuthi luzolandelelwa baze bagcine ngokuphuma ezikhundleni kunhlanga zimuka nomoya. Kulunge sekuphethe uMphathiswa uBongiwe Sithole-Moloi.