Awase KZN azodudulana kube ncane indawo
Bazobhema bakholwe abalandeli bebhola kwelikaMthaniya ngale mpelasonto njengoba kunemidlalo ehlabahlosile yeDStv Premiership. Okokuqala uzokuba namuhla ngoLwesihlanu omunye ukusasa. Namuhla kuzotholana phezulu IMartzburg United na-AmaZulu FC, eHarry Gwala Stadium ngele-19:30.
Okuyikho okuzoshubisa lo mdlalo ukuthi iMaritzburg United inengcindezi enkulu yokuwunqoba njengoba ingahlezi kahle kulogi, futhi nakumdlalo odlule ihlulwe ekuhambeni iChippa United ngelilodwa eqandeni. Kanti naMaZulu FC afuna amaphuzu agcwele lokho kuzowenza aqhubeke nokubalwa namaqembu ayisishiyagalombili aphezulu.
IMaritzburg United (iTeam of Choice) kulogi ihlezi endaweni ye-14 ngamaphuzu angama-20 emdlalweni eli-18, Usuthu lona lusendaweni yesishiyagalombili ngamaphuzu angama-23 emdlalweni elinganayo.
Kumdlalo womlenze wokuqala la maqembu adlale ngokulingana ngegoli elilodwa nhlangothi zombili, kowabe useMoses Mabhida Stadium.
Komunye umdlalo womkhaya okusasa ngophakathi kweLamontville Golden Arrows neRoyal AM.
La maqembu eza kulo ayatshutshumbelwa njengoba ethole induku ngeledlule, iLamontville Golden Arrows ibhaxabulwe kabuhlungu iTS Galaxy ngamane eqandeni kwathi iRoyal AM yehlulwa iKaizer Chiefs ngamabili eqandeni.
Okunye futhi okuyikho okuzodala kuguge utshani ePrincess Magogo Stadium ligamenxe elesi-3 ntambama, ukuthi i-Arrows izofuna ukuziphindiselela njengoba kumlenze wokuqala yakhala ngaphansi ngamathathu kwelilodwa. La maqembu futhi kulogi ayalandelana ahlukaniswe iphuzu kuphela, Abafana Bes’thende (iArrows) basendaweni ye-11 ngamaphuzu angama-22 kuthi iThwihli Thwahla (iRoyal AM) ibe kweye-12 ngamaphuzu angama-21.
Elinye iqembu laKwaZulu-Natal okuyiRichards Bay FC nayo izobonakala enkundleni namuhla lapho izotholana khona neSwallows FC ebhinjelwa izinto. Lo mdlalo wona uzobe eDobsonville Stadium, kulindeleke ukuthi kubonakale uDaniel Akpeyi ezintini zeSwallows ogcine esayinile naleli qembu abesejime nalo izinyanga eziyisithupha engenaqembu.
Kuzo ezithinta iDStv Premiership umdlalo okuyiwo othathwa njengomkhulu kule mpelasonto, ophakathi kwe-Orlando Pirates neMamelodi Sundowns.
ISundowns esiyithathile iligi isilwela ukubeka umlando wokunqoba imidlalo emingi ilandelana, kuyimanje isinqobe eli-13. Ngasohlangothini lwePirates yona ilwela ukuthi iyodlala e-Africa ngesizini ezayo njengoba ihlezi endaweni yesine kulogi, ifuna ukubalekela nomkhaya bayo iChiefs abahlukaniswe yiphuzu nje.
La maqembu atholanile mhla zingama-30 kuZibandlela, ompetha beDStv Premiership iSundowns ibona abanqoba ngamabili eqandeni.
Isiyonke imidlalo yeDStv Premiership kule mpelasonto ihlelwe kanje:
Namuhla:
- ISwallows FC neRichards Bay FC eDobsonville Stadium ngele-18:00
- IMaritzburg United na-AmaZulu FC eHarry Gwala Stadium ngele-19:30
NgoMgqibelo:
- Orlando Pirates neMamelodi Sundowns e-Orlando Stadium ngele-15:30
- ILamontville Golden Arrows neRoyal AM ePrincess Magogo Stadium ngele-15:30
- IChippa United neStellenbosch FC eNelson Mandela Bay Stadium ngele-15:30
- ISupersport United neCape Town City eLucas Moripe Stadium ngele-17:30
- IMarumo Gallants neSekhukhune United eRoyal Bafokeng Stadium ngele-20:00
NgeSonto
- ITS Galaxy neKaizer Chiefs eMbombela Stadium ngele-15:30