Lukhulu luyeza luyanyelela komasipala, amakhansela avota ngendlela eyehlukile
Amaqembu asebudlelwaneni neDA athukuthekele ngamakhansela avote nezitha
Idolobha laseGoli lithi umsebenzi womkhandlu uzoqhubeka ngaphandle kukaSomlomo. UMnu uVasco Da Gama weDemocratic Alliance (DA) ukhishwe esikhundleni sokuba nguSomlomo kulandela isiphakamiso sokungamethembi ngoLwesine.
Lesi siphakamiso sethulwe yiPAC futhi sesekwa yi-ANC ne-EFF. Ihhovisi leMeya lithi umkhandlu awunalo iPhini likaSomlomo ngakho-ke unobhala womkhandlu uzobhekana nemisebenzi kanye nokusebenza koMkhandlu.
Okhulumela iMeya uMabine Seabe uthe, “Ekuhlaleni okulandelayo koMkhandlu kuzokhethwa uSomlomo. Kumele kuqashelwe ukuthi inhloso yabamelene nathi kwezombusazwe ukwethula isiphakamiso sokungabethembi ubuholi beMeya ephethe emhlanganweni olandelayo woMkhandlu iwumzamo nje wokuthola izimali ezibekelwe ukuletha kwezidingo. Ikhansela uNks uLeah Knott, uthe kuzocutshungulwa indlela yokuphila kuwo wonke amakhansela nezimeneja eziphezulu.”
Izimo zohulumeni bamadlelandawonye
Ohulumeni bamadlelandawonye baphinde bakhombisa ukungazinzi futhi kubonakala sengathi akekho oqinisekisiwe ukuthi uzoqeda ihlandla lakhe. UDa Gama uxoshwe ngesonto eledlule kwathi kuMasipala Wesifunda saseKnysna, iDemocratic Alliance nayo yakhishwa ngevoti.
Ikusasa leMeya yaseGoli uDkt uMpho Phalatse lisengcupheni njengoba uhulumeni wobumbano ukhombisa ukuqhekeka. UMasipala waseKhuruleni nawo usengcupheni njengoba ukuhlangana kuvotwe ngokubambisana kwe-ANC ne-EFF kuvela.
“Kumanje i-ANC isize yasithinta eGauteng, ifuna kuxoxwe ngomasipala futhi siyakwamukela ukuxoxisana okunje. I-ANC iGauteng neKZN isikhulumile, kwafika ubuholi obusha eGauteng kwafika iKZN kodwa qiniseka ukuthi noma yini esiyenzayo izothuthukisa abantu,” kusho umholi we-EFF uJulius Malema.
La mazwi kaMalema asewushintshile kancane umdlalo wepolitiki komasipala abakhulu. I-ANC ne-EFF bavote ndawonye kuMasipala weTheku baphinde bavota ndawonye eMkhandlwini kaMasipala waseGoli ngokugudluzwa kukaSomlomo weDA.
I-ANC ifuna ukuya phambili futhi ihlakaze umfelandawonye weDA eGoli. “Impela bekunesivumelwano sokusebenzisana eGoli. Bekulindelwe isiphakamiso sokungamethembi uSomlomo futhi besilindele ukuthi wonke amadlelandawonye ayingxenye, i-IFP, i-ACDP neCOPE azovotela ukuphikisa lesi siphakamiso kodwa amabili e-ACDP, elilodwa le-IFP neleCOPE aseseka isiphakamiso sokungethenjwa. kwaba ukwephulwa kombimbi. Amadlelandawonye ayindlela yokufinyelela esiphethweni kodwa akusona isimo esikahle,” kusho uCilliers Brink weDA.
Okhulumela i-ANC eGauteng uLesego Makhubela uthe kuzomele kwenzeke ukuthi wonke amaqembu aboHlanga avote ngokubambisana. “Sihlangene sonke ngoba sibona ukuthi kunenkinga kubantu esibamele. Sizosusa futhi…sithathwe yiwo wonke la maqembu emkhandlwini waseGoli ukususa iDA,” kusho uMakhubela.
Ekhuruleni ikhansela le-Independent Citizens Movement uJoe Mojapelo usejoyine i-ANC ne-EFF. Amalungu eqembu avuke umbhejazane. “Sifuna ahambe uMnu Mojapelo ngoba uthatha izinqumo yedwa akaxoxi namuntu. Uphambane nomyalelo weqembu. Ngakho-ke sesithathe isinqumo sokumkhipha esikhundleni sokuba yilungu lomkhandlu,” kusho ilungu le-ICM NEC.
IDA ibukeka izozama ukuvikela uMasipala waseGoli nowaseKurhuleni kodwa konke lokhu kungase kube yize uma i-EFF igcina ivota ne-ANC.
