Ihlukene phakathi eyaboHlanga kwelomhlaba
Igcine iguqile impi yaboHlanga odabeni olungumongo womzabalazo wabo weminyaka – umhlaba. Lokhu kulandela ukuchithwa kwesiphakamiso ebesenziwe yi-African National Congress (ANC) ePhalamende kuleli sonto. Lesi siphakamiso besimayelana nokuchitshiyelwa koMthethosisekelo isigaba-25 esigxile kakhulu kubuninini bomhlaba nokuyiswa kwawo. Lapha obekulindelekile yikuthi i-ANC ikwazi ukuthola ukwesekwa yizandla ezingama-267 ukuze umthethosivivinyo lona uphase.
Nokho akubanga njalo njengoba igcine isithole amavoti angama-204 nakhona isilekelelwa yiqembu i-Al Jama-ha. Cishe onke amaqembu aphikisayo ePhalamende asichithile isiphakamiuso se-ANC ngezizathu ezahlukene. Abaphikise lesi siphakamiso babe yi-145.
Zithe zibekwa nje uKhongolose waqala washo izizathu ezenze baqhamuka nesiphakamiso lesi.
Ngomlomo kaMnu Motshekga, uKhongolose uthe: UMthethosivivinywa ochitshiyelwe ophambi kwethu ufuna sibheke ubugebengu obubhekiswe kwaboHlanga abaningi. Labo obekufanele bavote nathi kulolu daba bayazuza kulobu bugebengu obubhekiswe kwaboHlanga, futhi bayalekelelwa ekusebenzisaneni naboHlanga abangawazi umlando waleli lizwe futhi bayalekelela ngokuhlanganyela nabo.
“I-ANC isesemandleni futhi inakho konke engakusebenzisa ukuqinisekisa ukuthi abantu baseNingizimu Afrika bathola umhlaba. Ngakho-ke asikhathezekile ngokuthi obani abangahambisani nalo mthethosivivinywa. Bekhona noma bengekho i-ANC izokwenza ukuthi umhlaba utholakale kubantu, “ esho kanje.
Kulokhu umholi we-Economic Freedom Fighters (EFF) uMalema uphindisele ngelithi: “Umthethosivinywa okucelwe lendlu ukuba ihambisane nawo namhlanje kuzothatha umzabalazo waboHlanga ngomhlaba uwuphindisele emuva ngamagxathu amaningi.
“Umqondongqangi wokungaxephezeli awukaze ube khona ngesikhathi iPhalamende lithatha okwethulwe yi-EFF ngowezi-2018. Leli temu lafakwa ithimba lezomthetho lehhovisi lePhalamende libambisene nabanxenxi, abagwamande inqubo ngobugovane babo.”
Omunye umholi we-EFF uNdlonzi usole uKhongolose ngemizamo yokubuyisela aboHlanga emhlabeni eyimigubaneni: “Uma ibuzwa ukuthi kuquketheni ukuthi ‘ezinye izimo’. I-ANC ithi umhlaba olahliwe, owombuso kanye nobolile. Ubani ofuna umhlaba obolile, olahliwe veli ungowombuso futhi ungabiwa noma kunini kuhlaliswe abantu mahhala! Ngamafuphi i-ANC ayithandanga ukuthikameza amaBhunu nogombela kwesabo babelungu ngomhlaba,” kusho uNdlozi echazela izwe kwezokuxhumana ukuthi kungani bengavumelananga ne-ANC.
Obekhulumela Inkatha Freedom Party (IFP) uMnu uSingh uthe: “ Lo Mthethosivivinywa – uma uthathiwe – ngeke uguqule izindlela zobunikazi bomhlaba.
Inqubo isetshenziswe njengethuluzi lezepolitiki ukubheca izakhamuzi zakuleli ezingebona ongoti bezomthetho ukuba bakholelwe ukuthi uMthethosisekelo, hhayi uHulumeni, usephutheni lokwehluleka ukuletha izinguquko kwelomhlaba. Isizathu somcathu silula, uHulumeni ukhohlakele. UHulumeni uxhaphaze amaphreojekthi angokubuyiswa komhlaba ukuze kuhlomule abathile abakhethekile kanye nezigayigayi zeqembu elibusayo, ngaphansi kwamasonto amabili edlule, isikhulu sase-Eastern Cape eMnyangweni Wezolimo, Ezokubuyswa Komhlaba Nokuthuthukiswa Kwezindawo Zasemakhaya sitholakale sinecala okukhwabanisa imali engaphezu kwezigidi ezi-R2.6, ezimayelana nesibonelelo sokwabiwa komhlaba.
“Ngesikhathi izikhulu zikaHulumeni zigxisha amaphakethe azo, abalimi BoHlanga abasebenza kanzima balinde usizo lukaHulumeni,” kusho yena.
Uphethe ngelithi: “Iqembu i-IFP likholelwa ukuthi iSigaba 25, njengoba kubekiwe manje, sibanzi kakhulu ukuthi ‘singaba nobulungiswa nokulinganiseka’ odabeni oluthile ukunxephezela ukuthathwa komhlaba. UMthethosisekelo wethu awukaze ube nendlela yokuqinisekisa inani ngomhlaba. Kungabanobulungiswa ngandlela thizeni ‘ukunganxephezeli’ noma ‘ukungakhokhi’ kuwubulungiswa. Nokho lokhu kufanele kube mbalwa kakhulu neNkantolo kufanele ibe ngumlamuli ekunqumeni ngalokhu. Asikho nesincane isidingo sokuchibiyela uMthethosisekelo ukuhlola Amandla ngokomthethosisekelo.”