Izilimi zama-Afrika kuningi lapho zihamba zilumbane khona
Abasale sebezama aboHlanga ukugubha inyanga ye-Afrika esongwe ngoLwesithathu ngolwazi lomlando wezilimi zebele, ezinokuhlobana nobudlelwane nezabanye boHlanga basezwenikazi, okungubufakazi bobu-Afrika. Ukukhulisa amaxhama okuxhumana, okunciphisa ubutha, ukwexwayana nokungezwani singama-Afrika, ngoba eyokusungula izinto nobuchwepheshe isasehlula.
Njengokuba nolwazi ngezilimi isi-Oshiwambo, Oshikwanyama, Otjiherero, isiThimbukushu, isiRukwangali, iSetswana, isiKhoekhoegowab, isiJuhoan samaKhoisan nezinye zaboHlanga baseNamibia.
Kufakazelwa nayisichazamazwi saboHlanga abangamaHerero, esichaza amagama ngolimi isiTjiherero, isiBhunu, isiLungu, sabizwa ngokuthi: Otjiherero woordeboek, dictionary, embo romambo, esabhalwa ngokuhlanganyelwa nguJ.J Viljoen benoT.K Kamupingene.
Kunamagama akhulunywa ngesiTjiherero, ngesiTswana, ngesiSotho ngesiXhosa, nangesiZulu nezinye ancike olimini lwamaBhunu, lwase-Europe.
Ngasithenga lesisichazamazwi ngoba ngangifuna ulwazi nokwazi kangconywana nokuba nodlebe ngolimi lwebele isiTjiherero samaHerero aseNamibia uma ngiwelamela ngelinye ilanga.
Okwesibili ngangifuna ukuqhathanisa ulimi lwesiTjiherero nokuhlobana nezilimi zaboHlanga baseNingizimu Afrika, nokuqonda indlela yokubhala neyokuphimisa amagama. Akubanga lula ukuthola amagama esiTjiherero esichazamazwini.
Ngolimi lwesiTjiherero bakhuluma bathi, udura kupi okuwukuthi udura kae ngolimi lwesiTswana, lwesiSotho, lwesiPedi, okusho ukuthi uhlalaphi ngolwesiZulu. Uzobezwa bethi: kara ngesiTjiherero beqonde ukuthi hlala (ungahambi noma unganyakazi) ngokolimi lwesiZulu. NgesiTjiherero bathi, rara okuwukuthi lala ngokwabakhuluma ulimi lwebele isiNguni (bathi rara abanye boHlanga njengabakhuluma isiShona eZimbabwe nakwamanye amazwe).
AmaHerero ekhuluma ulimi isiTjiherero ethi, ami, okuwukuthi, mina, ngolimi lwebele lwabeNguni nolwesiZulu. Kube igama elithi evengali ngolimi lwesiTjiherero kanti ezilimini zaboHlanga baseNingizimu Afrika, kuthiwa ivangeli, livangeli. Babhale ukuthi Sondaha ngesiTjiherero, lapho-ke olimini lwesiTswana uSontaga, ngolwesiSotho wuSontaha, ngolwesiXhosa nguSontaha, ngolwesiZulu iSonto.
Kube ngelithi omuprofete,okungukuthi umphrofethi ngolimi lwesiZulu. Babize igama elithi iSabata kodwa libizwa noma lizwakala olimini lwesiZulu ngokuthi iSabatha. Bathi osatane ngesiTjiherero ngapha olimini lwesiZulu kuthiwa usathane. Ubezwe bethi papitisa ngapha esiZulwini nabanye bangabeNguni kuthiwa bhabhadisa.
Uzobezwa bethi otata ngesiTjiherero beqonde ukuthi tata ngokolimi lwesiXhosa, ntante olwimini lwesiTswana, lwesiPedi nesiSotho, ubaba ngolimi lwesiZulu noma ngolimi lwabeNguni. Bathi omama ngesiZulu beqonde ukuthi umama. Kanjalo onyoko okuwukuthi unyoko ngolimi lwesiZulu. Bathi onyama ekubeni bethi inyama abolimi lwesiZulu.
Ngeke wadideka ngolimi lwesiTjiherero ,uma bethi onyoka, okuwukuthi inyoka ngesiZulu. Bethi ongwe ngesiTjiherero okuwukuthi ingwe ngokwabakhuluma ulimi lwesiZulu, nabangabeNguni. Nangenkathi bethi otjiviki ngesiTjiherero, olimini lwesiNguni kubizwa ngokuthi iveki (iviki) ngolimi lwesiXhosa, impelasonto ngolimi lwesiZulu. Bathi eta ngolimi lwesiTjiherero, letha ngesiZulu, ngokwabangabeNguni.
Ungazitshela ukuthi ngowoHlanga waseNingizimu Afrika okhuluma ulimi lwesiTjiherero saseNamibia, uma ethi Nuka ngesiTjiherero, ngesiZulu kuthiwa nuka, wisa ngesiTjiherero, ngesiZulu wisa, ngesiTjiherero omuti, ngesiZulu umuthi, ngesiXhosa umthi, ngesiTjiherero oskole, ngesiZulu isikole, rira ngesiTjiherero, ngesiZulu khala, ngesiXhosa lila, omutwaro ngesiTjiherero, ngesiZulu umthwalo tukana (inhlamba) ngesiTjiherero, ngesiZulu inhlamba.