Ngabe ukuguqulwa kwegama kungaqeda isibunge seKruger National Park
Ngaphandle kokuba noMengameli wokuqala woHlanga owenza okungajwayelekile egqugquzela ukubambisana nokusebenzisana nababengabacindezeli, iNingizimu Afrika iyizwe elalivele linesibunge futhi laziwa emhlabeni jikelele ngezinto eziningi.
Okunye okwenza leli lizwe libe yintandokazi emhlabeni izimbiwa namagugu njengamalahle eHlobane, idayimane, eKhimbali, negolide eGoli. Leli lizwe liphakathi kwambalwa anezilwane zasendle ezinxenxa izivakashi zamazwe ezibizwa ngeBig 5, okuyibhubesi, indlovu, ubhejane, ingwe, inyathi. Lezilwane zitholakala eziqiwini ezimbalwa ezweni.
Esinye salezi ziqiwi iKruger National Park esifundazweni iMpumalanga esaziwa umhlaba wonke ngokunxenxa izivakashi zamazwe. Ngokwezibalo ze-African Business ngonyaka iKruger National Park ihanjelwa ngabantu abevile ezigidini ezimbili ngonyaka. izivakashi ezingama-80% kuthiwa ngeziphuma emazweni angaphandle. Emuva kokuhlasela koKhuvethe ngowezi-2021 lesi siqiwi sishayekile kulandela ukuvalwa iminyaka emibili. Muva nje izibalo zabavakashi senyukile okwenza kube ngesihanjelwa kakhulu ukwedlula zonke ezinye izindawo zokungcebeleka e-Afrika.
Kulezinsuku iKruger National Park isematheni kulandela isiphakamiso sesishayamthetho sesiFundazwe iMpumalanga sokuguqula igama laso sibizwe ngeSkukuza National Park.. ISkukuza ngelinye lamadolobha aseMpumalanga, eHazyview eliyingxenye yeKruger Natioanl Park yize liqhele ngebanga nalesiqiwi.
Yize ukushintshwa kwegama kuseyisiphakamiso, kubonakala isiShayamthetho sihlokoloze iziqandi njengoba kube nemvunge ezinhlakeni ezihlukene kusuka kosomlando, abezinhlangano zokuvakasha, osopolitiki kwaze kwananela nabantu ezinkundleni zokuxhumana. Isikhalo esikhulu kulabo abangayizwisisi eyokushintshwa kwegama ngesokuthi sizokwehla kakhulu isibalo sabavakashi ngoba yilona gama elinesibunge iKruger National Park.
UNkk uBertie Jacobs oyisazi kwezokuvakasha weNyuvesi iNorth West uthe akusona isikhathi esikahle sokuthi kungaguqulwa igama ngoba baningi abavakashi abazolahleka futhi kuzodala nokudideka. Uveza ukuthi uma uhulumeni wesifundazwe uhlabela phambili nalesiphakamiso kuzoba nomthelela omkhulu kwezomnotho emkhakheni wezokuvakasha, futhi leli gama yilona lesiqiwi elaziwa ngaso. “IKruger akubuzwa ukuthi yisona siqiwi esikhulu futhi esihlonishwayo emhlabeni esiqhathaniswa nezinye ezaziwayo njengeSerengeti neYellostone.”
USolwazi u-Elmarie Slabbert, onguMqondisi noMcwaningi emkhakheni iTourism Research in Economics, Environs and Society (TREES) uxwayisa ngokuthi lesi sinqumo kumele singathathelwa phezulu ngoba umphumela waso ungenza isiqiwi silahlekelwe okukhona ngokungekho.
“Siyavuma ukuthi uma singabizwa ngeSkukuza National Park abantu bendawo nalabo abakhelene nesiqiwi bangakuthakasela lokho kepha kumele silindele futhi ukuthi abantu baseNingizimu Afrika bangaphikisana nalokhu kuze kufike lapho benxenxa khona nabantu bakwamanye amazwe abazi lesiqiwi njengophawu olumqoka olubeka iNingizimu Afrika kwibalazwe lomhlaba,” kuxwayisa uSolwazi uSlabbert.
amaqembu aphikisayo esiShayamthetho eMpumalanga asephume umkhankaso wokunxenxa abantu ukuba baphikisane nokuguqulwa kwegama iKruger. Kusuka kuzwakale lezindaba ezinhlelweni zezindaba esiteshini somsakazo esikhulu eMpumalanga iLigwalagwala FM esisakaza ngesiSwati abalaleli bangena belakanyana bephikisana nokushintshwa kwegama.
Umlaleli uSizwe Mavuso uthe ezintweni eziningi abakhala ngazo zinsuku zaphuma kuhulumeni akukho neyodwa elandelwayo kodwa sebebona ukushintsha igama kuyiyona nto ehamba phambili.
“Kunemindeni yethu esebenza eKruger okungathi uma kushintshwa igama kugcine sekwehla isibalo sezivakashi kuncishishwe nabasebenzi ngenxa yokudideka”. Ezinkundleni zokuxhumana u-X noFacebook lolu daba lusengundabamlonyeni, iningi labaphawulayo liyaphikisana nalo. Abantu bathi kungani kushintshwa igama ngoba lesiqiwi yisona esenza kahle kwezokuvakasha futhi nohululumeni uyaziqhenya ngaso.
Ungubani uKruger okwethiwe ngaye isiqiwi
Kwelinye lamaphuzu abekwa isiShayamthetho ukushintshwa kwegama kuyingxenye yohlelo lukaHulumeni kaZwelonke lokubungaza amasiko nokulungisa umlando oyifagugu lezwe. Ngokolwazi oluthathwe kwiWilkipedia lesiqiwi siqanjwe ngoPaul Kruger owake waba nguMbusi wesiFunda iTransvaal isabizwa ngeKoloni ngeminyaka yowe-1800. Wazalwa zi-10 kuMfumfu we-1825 washona zi-14 kuNtulikazi we-1904.
Ngokomlando kuthiwa nguye owasungula lesiqiwi esenguMbusi waseTransvaal ngoba ebona isidingo sokuba izilwane endaweni iLowveld eMpumalanga zazidinga ukuvikelwa. Wagcina eshonela eSwitzerland lapho ayeye khona eyonxenxa amazwe omhlaba ukuba eseke abesizwe samaBhunu eNingizimu Afrika.