URamaphosa usenxuse abaholi base-Afrika ukuthi bathole ukuthula okungapheli e-DRC
UMengameli uCyril Ramaphosa uthe abaholi base-Afrika kumele baqhubeke nokufuna ukuthula okuhlala njalo eDemocratic Republic of Congo (DRC). Uhambele iNgqungquthela Yezinhloko Zamazwe ebibanjelwe eTanzania ngempelasonto.
Encwadini ayibhalela abantu baseNingizimu Afrika, uRamaphosa uthi le ngqungquthela ibizwe ukuze kubhekwe isimo sezokuphepha esintengantengayo empumalanga yeDemocratic Republic of Congo (DRC) kanye nokuthola isisombululo esimeme kwezepolitiki.
Lokhu kulandela ukushona kwamasosha ali-14 eSouth African National Defence Force (SANDF), ekanye namanye amasosha abambe iqhaza ekugcinweni kokuthula, edolobheni laseCongo iGoma.
Izidumbu zamasosha aseNingizimu Afrika zise-Uganda lapho zilinde ukubuyiselwa kuleli. Le ngqungquthela ivumelene nendlela ebandakanyayo yezingxoxo, okufanele ifake i-M23 ngaphansi kohlaka lwezinqubo eziqhubekayo zaseLuanda naseNairobi.
Laba baholi baphinde bayalele Izinduna Zombutho Wezokuvikela zesifunda ukuthi zihlangane zingakapheli izinsuku ezinhlanu ukuze zenze uhlelo lokuqinisekisa ukuphepha kwedolobha elilawulwa i-M23 iGoma, ukuvulwa kabusha kwesikhumulo sezindiza salo, ukukhishwa kwezakhamizi kanye nokubuyiselwa kwabashonile.