Kulindeleke asebenzise ubuhlakani uMosimane obhekene nomdlalo onzima
UPitso “Jingles” Mosimane uzobhekana nesivivinyo esinzima, njengoba iqembu aliqeqeshayo i-Esteghlal lizotholana phezulu ne-Al Ahli Saudi ehlezi phezulu kwilogi i-AFC Champions League.
I-Al Ahli Saudi ibophele abadlali abadume kakhulu kwi-English Premier League (EPL), lapho kubalwa uRoberto Firmino wodumo kwiLiverpool FC, u-Ivan Toney owayekwiBrentford, uRiyad Mahrez owayekwiManchester City no-Edouard Mendy owayevimba kwiChelsea FC.
UMosimane phambilini ubengumqeqeshi wayo i-Al Alhli Saudi ahlukana nalo kungazelele muntu, njengoba wabe eyinysele esigabeni esikhulu kumasizini amabili adlule. Ukuhlukana kwakhe naleli qembu kwaba muncu impela njengoba kwaze kwafakwana ezinkantolo ngenxa yokungaholelwa, udaba lwaze lwaxazululwa inhlangano ephethe ibhola emhlabeni iFifa.
Lo mdlalo ozobanjelwa eKing Abdullah Sports City, eSaudi Arabia uzoqala ngehora lesithupha manje kusihlwa. Lo mqhudelwano ususondela esigabeni seRound 16 kanti amaqembu ayi-8 iwona azoqhubekela phambili.
Kwi-Esteghlal FC uMosimane ufike kabi njengoba ethole umpentshisi emdlalweni emithathu ilandelana kodwa usekwazile ukuthi anqobe kanye. Uthe makuvulwa iwindi ufuna ukungena emakethe aqinise lapho kudingeka khona.
