UMbalula uthi ukufakwa kukaHlophe kuJSC akulungile
I-African National Congress (ANC) ithi ukuvumela umholi weQembu uMkhonto weSizwe (MK) ePhalamende uDkt uJohn Hlophe ukuthi ahlale kuJudicial Service Commission (JSC) kuyicala futhi kuwukuziphatha okubi.
Yize uHlophe eke waxoshwa yiPhalamende njengomehluleli, uphakanyiswe yiqembu lakhe ukuthi abe yingxenye yesigungu sasePhalamende esixoxisana nabazoba ngabehluleli. I-ANC ithi ukube bekuvotwa ukuphikisa lokho, ngabe ivotele ukungahambisani nokuqokwa kwakhe.
UNobhala Jikelele we-ANC, uFikile Mbalula, uthe njengoba bavotele ukuthi uHlophe asuswe esikhundleni ngabe namanje bavotele ukuphikisa ukufakwa kwakhe kuJSC.
“Ukungeneliseki ngokuqokwa kukaJohn Hlophe kuyiphuzu eliqinile. Uma kungathiwa siyavota sizovotela ukuthi angangenu kuJSC. Okushiwo nguSotswebhu wethu, imithetho mayelana nokufaneleka kwelungu ukungenela amakomiti ayikhulumi uma kukhulunywa ngomuntu otholwe enecala wakhishwa esikhundleni. Ngakho-ke kusemahlombe ePhalamende ukuyilungisa le nto. Kungaba yicala uma kuvunyelwa, indoda eyayingumehluleli futhi yabekwa icala eyagcina isixoshwa esikhundleni ngalo ibe ingxenye yeJSC. Manje sekumele ahlale esigungwini ahlulele abanye bese ebabuza imibuzo. Ayinasimilo futhi ayilungile, kumele ilungiswe yilona iPhalamende,” kubeka uMbalula.