Umbiko we-UN ngezingane zempi
Umbiko omusha we-United Nations (UN) uthi ngowezi-2023, udlame olubhekiswe ezinganeni ezimpini lwafinyelela emazingeni adlulele ngokwenyuka okushaqisayo kwama-21%.
Umbiko waminyaka yonke ngeChildren in Armed Conflict futhi ngokokuqala ngqa wabala amabutho akwa-Israel ‘ohlwini lwayo lwamahloni’ lwamazwe ahlukumeza amalungelo ezingane ezimpini.
Lo mbiko ubala nabalingisi abangewona abombuso iHamas kanye nePalestinian Islamic Jihad esithasiselweni sayo samaqembu ahlukumeza amalungelo ezingane. Umbiko uthi izingane zabulawa futhi zagogeka ngamanani angakaze abonwe ezinhlekeleleni ezimbi kakhulu kwa-Israel kanye nasezindaweni ezihlaselwe zasePalestine, ikakhulukazi iGaza Strip, kodwa naseBurkina Faso, eDemocratic Republic of Congo, eMyanmar, eSomalia, eSudan, eSyrian Arab Republic kanye nase-Ukraine phakathi kwabanye.
Lo mbiko, ongakakhishwa esidlangalaleni kodwa obonwe yiSABC News, uveze ukuthi kunamacala ayizi-5 698 kwamasosha akwa-Israel ahlomile nabezokuphepha, ali-116 kuHamas kwathi angama-21 kwenziwa yiPalestinian Jihad. Umbiko uthi isibalo esiphezulu sokwephulwa komthetho siqinisekisiwe kwa-Israel kanye nasezindaweni zasePalestine, eDemocratic Republic of Congo, eMyanmar, eSomalia, eNigeria naseSudan.
I-UN ikuqinisekisile ukubulawa kwezingane eziyizi-2 267 – ikakhulukazi eGaza phakathi kukaMfumfu ziyisi-7 nomhla zingama-31 kuZibandlela kodwa yabuye yachaza ukuthi ngenxa yezinselelo ezinzima zokufinyelela, ikakhulukazi eGaza, ukuthi ulwazi olwethulwe embikweni lwalungamele isilinganiso esigcwele sokuhlukunyezwa kwezingane.
Umbiko uphinde uthi ukuhlasela kweHamas kwa-Israel ngoMfumfu odlule kanye nokusabela kwezempi okwalandela eGaza kuholele ekwenyukeni kwama-155% kokuhlukunyezwa kwezingane.