UMengameli wezwe ududuze izihlobo zabatheze ilala e-Eastern Cape
UMengameli uCyril Ramaphosa udlulise amazwi enduduzo emindenini yase-Eastern Cape ekhahlanyezwe yizikhukhula ezihlasele eNelson Mandela Bay, eBuffalo City, eKariega, nakwezinye izindawo esifundazweni.
Esitatimendeni, uMengameli uRamaphosa uthe, “Ukulahleka kwempilo, ukucekelwa phansi kwengqalasizinda yomphakathi, kanye nokulahleka kwempahla yomuntu siqu okulethwe amandla emvelo kusiphatha kabi sonke njengabantu baseNingizimu Afrika.”
UMengameli uncome imizamo yokubambisana yeziphathimandla, imiphakathi, izinhlangano ezingekho ngaphansi kukaHulumeni, kanye nabantu ngabanye ekulawuleni imisebenzi yokuhlenga. Lokhu kuhlanganisa ukuhlalisa kabusha imindeni eminingi esale dengwane ngenxa yezikhukhula.
UCraig Lambinon, okhulumela iNational Sea Rescue Institute (NSRI), ubike ukuthi kutshalwe inqwaba yemisebenzi yezandla kanye nabasebenzi ukusiza amaphoyisa nezinye izinhlangano emkhankasweni wokuthungatha nokuhlenga oqhubekayo.
Babalelwa ema-70 abantu asebetakulwe emisebenzini engama-55 yokutakula kusukela ngeSonto, ngokusho kweNSRI.
Ngempelasonto, iSouth African Weather Service ikhiphe isexwayiso sesigaba 6 esiluphuzi esibikezela ukuthi kuzoba nomoya onamandla, ukuwa kweqhwa nezikhukhula ezingxenyeni zeWestern Cape, KwaZulu Natal, eNorthern Cape nase-Eastern Cape.
Kwesinye isigameko, iNSRI ithole ngokuphepha owesilisa esiqhingini esiseBrak River ngemuva kokuthi imoto yakhe, ebinabagibeli abayisithupha phakathi, ivaleleke ezikhukhuleni ngemuva kokukhukhulwa ngaphansi kwebhuloho.
Umndeni, okukholakala ukuthi ubuvaleleke emotweni kwaze kwaba phakathi kwamabili, uvule iwindi elingemuva lemoto wazama ukugibela ophahleni lwemoto.
Lesi sifundazwe sijwayele ukuba nezikhukhula esezidlule nemiphefumulo yabantu abaningi zadala umonakalo nengqalasizinda.
Ngowezi-2023, izikhukhula ezinamandla zabulala abantu abathathu zakhukhula namabhuloho e-Ingquza Hill, eKing Sabata Dalindyebo nasePort Saint Johns.
